Utoqqarnut inissiat ajorluinnartut Qeqertarsuarmi

Utoqqarnut inissiaq ima qiianartigisoq uffarfiup natiani imeq unnuakkut allaat qerruttarluni – inissiarlu najugaqarfigissallugu ima navianartigisoq, qatserisartut ittuat allaat oqarluni, inissiaq inunnit najugaqarfigineqarnissaminut naleqqutinngitsoq – ilaa soorlu asuli – Qeqertarsuarmili utoqqarnut inissiani arfineq-pingasuni Ammassivinnguamiittuni najugallit taama atugassaqartitaapput. Atuagagdliutini ullumi saqqummersuni tamanna atuarneqarsinnaavoq.

Utoqqarnut inissiat taakku Qeqertarsuup Kommuneata pigisarai. Inuusuttunit suliffissaqartinniarneqartunit, sanaartornermilu suliaqarfitsigut piginnaassuseqanngitsunit, misilittagaqanngitsunillu, inaarsagaapput. Sanaartornermi maleruagassat atuuttut unioqqutillugit inissiat aamma sananeqarsimapput. Ikuallattoqalissagaluarpat illersuutigisinnaasanik iigaqannginnera pissutigalugu inneq eqqaamiuminut siaruaatipallattussaassaaq, inissiammi uiguleriittut sanaajupput.

- Taakkunani najugaqartoqarsinnaanngilaq, tamanna navianarpallaaqaaq, Qeqertarsuarmi qatserisartut ittuat, Abel Brandt AG-mut oqarpoq.

Utoqqarnut inissiat nutaat maanna aamma sananeqarput – taakku 2006-mi aallartinneqarput. - Kommuni qanoq iliorsinnaanngilaq, teknikkimut, avatangiisinut sillimaniarnermut ineqarnermullu ataatsimiititaliami siulittaasoq, Timooq Mølgaard, Atassut, oqarpoq.

- Inissiat nutaat sananeqarnerisa naammassineqarnissaasa tungaanut arlaannik iliuuseqarsinnaanngilagut, Timooq Mølgaard, Atuagagdliutinut oqarpoq.