Joel Ezekiassenip nioqqutissat ulluinnarni naliginnaasumik atorfissaqartinneqartut, soorlu sioraasat akiisa qaffassimanerat malugilluarsimavaa. Aamma neqeroorutit alapernaasertuartarlugit oqarpoq:
-Tassa nioqqutissat neqeroorutigineqarnissaat utaqqisarparput, soorlumi maannakkut Brugsenimukarpunga neqeroorutit utaqqisimasakka pisiariartorlugit, ippassarlu aamma KNI-mi neqeroorutinik pisiniarpunga. Tamakkua sillimaffigiuarpagut, aammami utoqqalinersiaqaratta Joel Ezekiassen nassuiaavoq.
Joel Ezekiassen aammattaaq isumaqarpoq nioqqutissat ilaat akisuallaartut.
Atuisartoq alla Karl Peter Felimonsen isumaqarpoq nioqqutissat akii qaffakkiartuinnartut.
- Assut erloqinarpoq sualummik arlalinnik meerartaqarluni. Nioqqutissat ulluinnarni atorfissaqartitavut assigiinngitsut akii qaffakkiartorput, soorlu sioraasat, iffiat qallersuutissallu, Karl Peter Felimonsen oqarpoq, nioqqutissanillu pisiniaraangamik pisiassatik ullunut 14-nut tulleriiaartariaqartarlugit.