Utoqqalinersiat qaffanissaat tamarmik taperserpaat

Utoqqalinermi pensionisiat pillugit Inatsisartut peqqussutissaattut, Ilaqutariinnermut Inatsisinillu Atortitsinermut Naalakkersuisup Aleqa Hammondip siunnersuutaa - Inatsisartut upernaakkut katersuunneranni aalajangiiffissat annertuut ilaat- Inatsisartuni ullumi pingajussaanneerneqartoq, Inatsisartuni tamarmiusunit akuersissutigineqarpoq.

Siunnersuutip akuersissutigineqarnera sioqqullugu Inatsisartut Ilaqutariinnermut Ataatsimiititaliaanni marloriarluni isummerfigineqarpoq, akuersissutigineqarnissaalu innersuussutigineqarluni.

Pensionisiaqartut atugaat pillugit nassuiaat Naalakkersuisut siorna 2006-imi aasakkut suliaraat, Inatsisartullu ukiakkut ataatsimiinneranni saqqummiunneqarmat oqillineq aalajangiiffissatut siunnersuummik inernilerneqarpoq, Naalakkersuisut pensionisiaqarnermut malittarisassanik ukioq manna 2007-mi juulip aallaqqaataanni atuutilersussamik allanngortitseqqullugit peqquneqarlutik.

Siunnersuutigineqarpoq Utoqqalinermi pensionisiat aamma siusinaartumik pensionisiat pillugit malittarisassat avissaartinneqassasut.

Aamma kisermaat utoqqalinermi pensionisiaat ukiumut 110.000 koruunit missaannut qaffanneqassasut, kiisalu aappariit ukiumut pensionisiaat 150.000 koruniit missaannut qaffanneqassallutik.

Aamma pensionisiaqartut kisermaat pensionisiaannut kinguneqartinneqanngitsumik allatigut ukiumut 56.000 koruuninik isertitaqarsinnaalernissaat aappariillu pensioniminnut kinguneqartinneqanngitsumik allatigut ukiumut 84.000 koruuninik aamma isertaqarsinnaalernissaat, Inatsisartut ullumi akueraat.

Pensionisiaqartitsisarneq pillugu peqqussutip allannguutaa ukioq manna 2007-mi juulip aallaqqaataat aallarnerfigalugu atuutilissaaq.

Utoqqalinermi pensionisiaqalissagaanni ukiut 63-iniit 65-inut ukioq 2008-imiit atuutilersumik qaffanneqassapput.

Utoqqalinermi pensioninik qaffaanissaq 63 million koruuninik akeqassaaq, taakkulu akileraarutinik qaffaanikkut matussuserneqannginnissaat Siumut Demokraatit kiisalu Kattusseqatigiit kissaatigaat.