Utoqqalinersiat assigiinngeqaat

Qaanaami utoqqalinersialik kisermaaq akiligassat akilereerlugit qaammammut 1.200 koruuninik tigummiassaqartinneqartartoq, Sisimiuni kisermaaq 4.300 kroninik tigummiassaqartinneqartarpoq.

Aappariinnut Qaanaamiittunut Sisimiuniittunullu assigiinngissut aamma malunnaqaaq. Qaanaami aappariit 2.400 koruuninik pissaqartinneqartut, Sisimiuni aappaariit 7.300 koruuninik pissaqartinneqartarput.

Kisermaanut assigiinngissut 3000 koruuninik anneruvoq, aappariinnullu 5000 koruuningajaalluni.

Tamanna inatsisartuni ilaasortap Astrid Fleischer Rex-ip, Demokraatineersup, isumaqatiginngilaa:

- Imaanngilaq, utoqqartagut Nunatsinni ukiorpassuarni sulereeramik, utoqqalinersiuteqalerunik sumi kommunimiinneq apeqqutaatissagaat. Demokraatit siunnersuutigaat, utoqqalinersiat toqqammaviusut tamarmik assigiinnerulersillugit 110.000 koruuninut qaffanneqassasut. Astrid Fleischer Rex:

- Kisermaajugunik aappariikkunilluunniit 25 procentimik qaffaavigineqarnissaat siunnersuutigaarput.

Inatsisartut utoqqalinersiat arlaleriarlugit oqallisigisarpaat. Oqaluuserisassaq siorna kinguartinneqarpoq, paasissutissanik katersinissaq pisariaqartinneqarmat. Astrid Fleicher Rex maanna isumalluarneruvoq.

- Inatsisartunngoramali siunnersuutinik taama ersaritsigisunik aatsaat takuvunga, siunnersuutit assigiinngitsut pingasut.

Inatsisartut 2007-mut Aningaasanut Inatsisissaq naammassereerunikku pensionit pillugit nassuiaat oqaluusereqqissavaat.