Utoqqalinersiaqarnerup aaqqissuuteqqinnera iluatsilluarpoq

Januaarip aallaqqaataani 2009-mi utoqqalinersiaqalernissamut ukioritinneqartut qaffanneqarput, taamaalilluni januaarip aallaqqaataata kingorna 63-nik ukioqalersussat utoqqalinersiaqalinnginnissaat anguneqarluni.

63-nik ukiullit sulisinnaasutut naatsorsuutigineqaleraluartut, 2009-mi taamatut ukiullit akornanni suliffissaaleqineq qaffagaarsimanngilaq. Tassami 60-niik 63-t angullugit ukiulinni suliffissaaleqisut 26-naasimammata.

- Nuannaarutigaara utoqqalinersiaqartarnerup aaqqissuuteqqinneqarnera takusinnaagakku ajunngitsumik ingerlasoq, Aleqa Hammond, Siumut siulittaasua oqarpoq.

2007-imi maaji qaammataagaa, Aleqa Hammond Ilaqutariinnermut Eqqartuussiveqarnermullu Naalakkesuisuunermini, utoqqalinersiaqartarneq pillugu aaqissuusseqqinneq Inatsisartuni akuersissutigitippaa.

Utoqqalinersiaqartarneq pillugu aaqqissuusseqqinnissaq politikerinit qangali kissaatigineqartarsiamavoq. Utoqqalisartut ukioqqortusisimapput aammalu timikkut peqqinnerulersimallutik. Utoqqalisartut kingusinnerusukkut utoqqalinersiaqartalerneranni anguniarneqarpoq sivisunerusumik suliffimmiittalernissaat, taamaalilluni Nunatta karsianut aamma iluaqutaalersussaassalluni.

- Piffissap sivikitsup iluani aningaasartuutit annertoorujussuugaluarput. Piffissarli sivisunerusoq isigalugu inuiaqatigiinnut aningaasatigut atugassaqartitsisussaavoq, Aleqa Hammond oqarpoq.

Utoqqalinersiaqarneq pillugu aaqqissuusseqqinneq suli inissivinneqanngilaq. Aaqqissuusseqqinnerup kingunerisa ilagaat utoqqalinersiat qaffanneri. 2007-miit 2012-p tungaanut utoqqalinersiat tunniunneqartartut 130 millioni koruuniniit 460 millioni koruuninut qaffassagatinneqarput.

2007-imi maajiugaa utoqqalinersiaqarnerup aaqqissuuteqqinnissaa siunnersuutigineqarmat Inatsisartuni ilaasortat tamarmiusut, tassa 31-t isumaqataallutik taaseqataapput.

Utoqqalinersiaqarnerup aaqqissuuteqqinnerata kinguneranik januaarip aallaqqaataani 2010-mit utoqqalinersiaqalerniaraanni 65-nik ukioqalersimasariaqarpoq.