Utoqqalinersiallit tapisianik piumasaqanngillat
Tapisiat ukiuni arlalinni eqqunngitsumik naatsorsorneqartarsimasut kommunit kattussuunneqarneranni paasineqarpoq.
Kommunimit ilimagineqarpoq utoqqalinersiallit aningaasanik amerlavallaanik pisarsimasut, utoqqaalli ikippallaanik tapisisarsimallutik isumaqartut aviisini ussassaarutitigut, tassa annoncetigut, kommunimut saaffiginneqqullugit kajumissaarneqarput.
Kommuneqarfik Sermersuumili atugarissaarnermut immikkoortortaqarfimmi fuldmægtigi, Hans Jensen, oqarpoq, saaffiginnittoqarsimanngivissoq.
- Saaffiginnittoqangaatsiarnissaa ilimagisimagaluarparput, taamali pisoqanngilaq.
Kommuneqarfik Sermersooq 2009-mi januaarip ulluisa aallaqqaataanni pilersinneqarmat tapisianik naatsorsuisarneq allanngortinneqarpoq. Tapisiat Nuup Kommuneata eqqunngitsumik naatsorsortarsimagai Nuup Kommuneani ikaarsaariarnermut ataatsimiititaliaq ombudsmandip ilumoornerarpaa.
