Utoqqaat innarluutillillu sipaarniarnermit eqqugaasussanngorput
Sipaarniarnerup kinguneranik utoqqaat namminneerlutik angerlarsimaffeqartut ikiorteqarnissaminnilli pisariaqartitsisut nalunaaquttap akunnerini ikinnerusuni ikorneqartalissapput.
- Utoqqaat eqqarsaatigalugit angerlarsimaffimmi ikiorteqartitsisarnermi taakkunani tiimit atorneqartartut sukaterniarsarivagut. Tassuunalu utoqqaat maluginerussavaat angerlarsimaffimminni ikiorteqartinneqarnerat annikillisinneqassammat,Qaasuitsup kommuniani Inunnik isumaginninnermi ilaqutareeqarnermullu ataatsimiititaliami siulittaasoq Atassummeersoq Naja Petersen taama oqarpoq.
Sipaarniuteqalernermi utoqqaat angerlarsimaffimminni ikiorteqartartut saniatigut aamma innarluutillit tapersersorteqarnissamik pisariaqartitsitsut sipaarniarfigineqartussanngorput. Tamatumani sipaarniutaassalluni innarluutillit tapersersortaasa piffissamik atuinerat.
-Taakkua saniatigut innarluutilinnut tapersersorteqartitsineq atuisuusunut annaasaqaataanngitsumik iliuuseqarfiginiarsarivarput, Naja Petersen oqarpoq.
Innarluutillit utoqqaallu sipaarniarfigineqartussanngornerat utoqqaat ilaannit akueriuminaatsinneqarpoq:
- Utoqqaat ajornerusumik atugaqalinnginnissaat neriorsuutigineqartarpoq. Aamma allaat pitsaanerusumik atugaqalernissaat neriorsuutigineqartarsimagaluarpoq. Kisiannili tassa ullumikkunaasiit aamma paasivarput tamatuma akerlerluinnaanik eqqugaasussanngorluta, Magnus Therkelsen 73-nik ukiulik, Aasianni nammineq angerlarsimaffimmini najugaqartoq, angerlarsimaffimminilu ikiorteqartinneqartartoq taama oqarpoq.
Sipaarniarnerli avaqqunneqarsinnaanngilaq.
- Uggornaraluartumik ullumikkut taamatut inissisimasoqarpoq, allamillu aqqutissaqannginnatta sipaarniaqqinnerulertariaqarpugut, Naja Petersen oqarpoq.