Utoqqaat illuat ulluni aqqaneq marlunni imeqanngitsoq

Alluitsup Paani issittorujussuuvoq, tamannalu utoqqarnut 'Utoqqarmiuni' najugaqartunut annertuumik sunniuteqarnerluppoq, tassa erngup aqqutai ruujorit maanna ullut aqqaneq aappassaanni qereqqapput, allaat utoqqaat uffarsinnaanatilluunniit.

Allattoq Apollo Jeremiassen, Thomas Munk Veirum

decembarip 08-at 2015 14:29

- Tamanna utoqqaat illuannut, Utoqqarmiunut sunniuteqarnerluppoq. Errorsisinnaanngilagut utoqqaallu uffarsinnaanngillat. Taamaattumik nunaqarfimmi kuummup imertartarpugut.

Utoqqarmiuni pisortap tullia, Naime Stach taama oqarpoq.

Alluitsup Paani erngup aqqutai arlallit, novembarip 27-annili issimik ajoquserneqarlutik nunaqarfimmiunut imermik pilersuineq unippoq.

- Maanni suli issittorsuuvoq, Naime Stach oqarpoq.

Issinnera pissutaalluni ruujorit qerruteqqapput

Nukissiorfiit tusagassiuutinut nalunaarumminni ullumi allapput, erngup aqqutaanik iluarsiiniarneq ingerlanneqartoq, erngulli aqqutaasa ilaat pisoqaammata taakku aasserniarneri ajornartorsiutaasut allallutik.

Aamma atuaruk Illoqarfiit pingaarnersaanni anorersuaq

Erngullu aqqutaasa qerrussimaneri nunaqarfimmiunut minnerunngitsumillu utoqqaat ineqarfianni, Utoqqarmiuni najugaqartunut sunniuteqarnerlulluni.

- Utoqqaat illuanniit, Utoqqarmiuniit ungasilaartumut tassa oqaluffiup eqqaani kuummut imertartarpugut. Allatullu ajornartumik utoqqaat ilaani imertartorisarpagut.

Aamma atuaruk ASSIT Nuup ilaani Nuussuarmi imermik pilersuineq akornuserneqartoq

Imeq utoqqaat illuanni najugaqartunut quligiluaasunut atorfissaqartinneqartaqaaq aamma perusuersartarfinnut.

- Utoqqarmiuni imeq ullormut pisariaqartittaqaarput. Aamma perusuersartarfiit imermik immerneqanngikkunik kuussinnaanngimmata imermik atuinerput assut annertuvoq.

Alluitsup Paani utoqqaat ineqarfianni 'Utoqqarmiuni' pisortap tullia, Naime Stach taama oqarpoq.