Utaqqisunik qitiusumik allattuiffik aallartippoq

Meeqqanut ulloq unnuarlu angerlarsimaffinnut utaqqisunut Namminersornerullutik Oqartussat qitiusumik nalunaarsuiffiat kiisami atulerpoq.

Qitiusumik nalunaarsuiffik januaarip aallaqqaataanili atulertussaasimagaluarpoq, qarasaasiakkulli atortorissaarutilersuineq ilimagisamit sivisunerummat kinguaattoorluni.

Maannali atulermat, kommuneqarfiit meeqqanut ulloq unnuarlu angerlarsimaffinnut utaqqisuutiminnik marsip 15-iutinnagu nalunaarsueqqullugit Ilaqutariinnermut Pisortaqarfik piumasaqarpoq, Martha Lund Olsen Ilaqutariinnermut Pisortaqarfiup pisortaa oqarpoq.

Nalunaarutigineqartut qitiusumik nalunaarsuiffimmut allattorneqassapput, kingornalu sineriak tamakkerlugu utaqqisut qanoq amerlatiginersut takuneqarsinnaalissasoq, Martha Lund Olsen oqarpoq.

Taamaattoq utaqqisunik nalunaarsuineq sivisusinnaasoq, Martha Lund Olsen oqarpoq neriuutiginerarpaalu kommunini ataasiakkaani nalunaarsuineq apriiliutinnagu naammassiumaartoq.