Utaqqisuni normu 1.800-voq
Københavnimi eqqaanilu ilinnialerniarlutik qinnuteqartorpassuit kalaallit ilinniagaqartut aamma eqqorpaat. Københavnimi kollegiat allattoqarfiat naapertorlugu kollegiami inissarsiniarlutik utaqqisut 8.000-upput kalaallillu ilinniagaqartut utaqqisorpassuit akornanniipput.
- Angut inuusuttunnguaq ippassigami allaffitsinnut iserpoq ilisimatillutalu Københavnimi eqqaanilu kollegiami inissarsiortuni utaqqisuni normu 1.800-ulluni ilisimatinneqarsimalluni, Københavnimi Kalaallit Illuutaanni ilinniartunut siunnersorti Pia Rosing Heilmann KNR-imut oqaluttuarpoq.
Nunatsinneersut 202-ut Københavnimi eqqaanilu ilinnialerniarlutik ukiormanna qinnuteqarput pingasullu maanna nalunaarput inissarsisinnaannginnertik pissutigalugu ilinniagarerusutaminni aallartissinnaanatik.
Københavnimi eqqaanilu kollegianik amigaateqarneq suli ilungersunarnerulerpoq Københavnip Universitetiani ilinnialerniarlutik qinnuteqartut aatsaat taama amerlatigimmata ukiormanna 27.528-gamik.
Ilinnialerniarlutik qinnuteqartorpassuit Jyllandimiit Fynimiillu aggersuupput taamalu Københavnimi eqqaanilu kollegiani inissat 10.000-usut amigarsilluinnartarlutik. Amerlaqisullu allatigut inissarsiortariaqartarput ilinniagaq pilerigisartik aallartiffigisinnaajumallugu.
- Ilisimavarput arlaqartut ilaquttaminni ilisarisimasaminnilu najugaqarallartariaqartartut kollegiani inissarsinissaminnut utaqqinnerminnit, Pia Rosing Heilmann oqarpoq.
Københavnimi Kalaallit Illuutaat, Københavnip kommunia aamma Namminersorlutik Oqartussat maanna suleqatigiillutik misissuipput kalaallit ilinniagaqartut Københavnimi eqqaanilu kollegiarisinnaasaannik aaqqiissutissamik ujarlerlutik.
- Suliaq aatsaat aallartimmat siusippallaarpoq annerusumik oqaaseqarfigissallugu. Kisianni siunissaq ungasinnerusoq eqqarsaatigalugu aaqqiissutissamik ujarlerpugut, Kalaallit Illuutaanni pisortaq Inger Bruun KNR-imut oqarpoq.
Pissutsilli allaanerulluinnarput kalaallit ilinniagaqartut qinnuteqarfigisagaanni Odensemi, Aarhusimi aamma Aalborgimi.
Illoqarfinni taakkunani ilinnialerniartut kollegiani inuusuttullu najugaanni inissaarsinissamut qulakkeerinnissunneqartarput. Taamaammat illoqarfinni taakkuani Kalaallit Illuutaasa naatsorsuutiginngilaat kollegiani inissaaleqisoqarnissaa.