Utaqqiisaasumik ineqartitsinermut akiliisitsisalernissaq suli paasineqanngilaq

2010-mut aningaasanut inatsimmi, atorfinerlaanit utaqqiisaasumik ineqartinneqartut akiliutaannit, 4 millionit koruunit, Nunatta karsiata isertissagai missingersuusiorneqarpoq. Taamaattorli akiliisitsisalernissaq suli aalajangiiffigineqanngilaq.
Allattoq Elisa Isaksen
januaarip 12-at 2010 05:16

Oktobari qiteqquttoq saqqummiunneqarpoq, Namminersorlutik Oqartussat siunnersuutigigaat, atorfilittatik, utaqqiisaasumik ineqartinneqartut kvadratmeterimut ataatsimut 580 koruuninik ukiumut akiliuteqartassasut. Taamaalilluni innaallagissamik, imermik kiassarnermillu atuinerit matussuserneqarniassammata. Taamatut siunnersuuteqartoqarnera kattuffinnit naammagineqanngeqaaq.

Isumaqatigiinniarnerit suli ingerlasut, tusagassiorfitsigut eqqartorneqarneq ajorput, taakku oqarput. Kisianni isumaqatigiinniartoqanngitsoq, kattuffinnulli tusarniaasoqartoq, Namminersorlutik Oqartussat isumaqatigiinniartartoqatigiivini pisortap Palle Frederiksenip oqaatigaa.

Oktobarip qiteqqunnerani siunnersuutigineqartoq suli atuunnersoq - imaluunniit akiliutigineqartartussaq annerussanersoq, minnerussanersoq imaluunniit akiliisarnerup qaqugu atuutilernissaa - maanna suli paasinarsinngilaq. Januaari naatinnagu Namminersorlutik Oqartussat kattuffiit pineqartoq pillugu oqaloqatigissavaat.

- Kattuffiit ataatsimeeqatigereertinnagit oqaaseqarusunngilagut, Peter Hansen Aningaasaqarnermut Sulisoqarnermullu Naalakkersuisoqarfimmeersoq oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq