Utaqqiisaa inigigallartakkat aningaasartuutaaqaat
Nuummi initaarniarluni sivisoorujussuarmik utaqqisoqartarpoq, sulisunut inigitinneqartartut aamma sivisuumik utaqqineqartarput. Sulisut ataavartumik inissaminnik utaqqitillugit Namminersornerullutik Oqartussat utaqqiisaa inigineqartunut akiliisariaqartaramik annertuumik aningaasartuuteqartarput.
Namminersornerullutik Oqartussat 2006-imi inigitinneqarallartunut 10,8 milliuuni koruunit aningaasartuutigeriarlugit 2007-mi 17,2 milliuuni koruunit aningaasartuutigaat, ilimagineqanngilarlu qanittukkut inigineqarallartunut aningaasartuutit ikilinissaat.
Atassuteqarnermut naalakkersuisoqarfimmi immikkoortortami pisortaq, Ruth Lindhardt oqarpoq pissutsit taamaannerat assigiinngitsunik peqquteqartoq, assersuutitullu taallugu Tuapannguani nutarterineq, tamaani inissiat marluk isaterneqarmata taakkunani ineqaraluartut inissianut allanut inissinneqarput. Inissiat isaterneqartut inaanni maanna piginneqataaffigalugit inissiat sananeqarput, isaterneqartunilu ineqarsimasut inissiani nutaani piginneqataallutik initaarnissaminnut neqeroorfigineqarput. Inissialli nutaat iserterfigineqarsinnaalersinnagit utaqqisariaqarneq suli sivitsoqqippoq, aamma sulisunut inissaritinneqartut eqqarsaatigalugit. Tamassumalu kingunereqqippaa suli inigigallakkanut aningaasartuutit amerliartornerat. Tuapannguani inissianik nutaanik sanasoqalermat nalunngilarput piffissami tassani sulisut inigigallagassaannut aningaasartuutit amerleriassasut. Siornatigullu inissiat attartortittakkat isateriarlugit piginneqataaffigineqartussanik taarserlugit misiliinikuunnginnatta ilinniarfigisimavarput. Siunissami isatereriarluta sanaartortassanngilagut, sanaartugassalli naammasseriarlugit aatsaat isaterisassaagut. Pissutsit ilungersunarnerannut aamma pissutaavoq 2005-imi inissianik attartuisarfiit marlunngornerat, Namminersornerullutimmi Oqartussat tamatuma kingorna kommunep attartuisarfiutaaniit ininik attartorsinnaajunnaarpoq. Tuapannguani inissiat siulliit 30-it aappagu iserterfigineqarsinnaalissapput. Inissiat sinneri 2011-mi iserterfigineqarsinnaalerpata initaarnissamik utaqqinerit, taamatullu aamma sulisunut inigitinneqartartunut utaqqinerit sivikillinissaat neriuutigineqarpoq, taamaalilluni inigigallakkanut aningaasartuutit aamma ikiliniassammata, Ruth Lindhardt oqarpoq.
