USA's præsidentia Joe Biden præsidentimut qineqqusaarnermit tunuarniuteqartoq

USA-p præsidentia Joe Biden, USA-mi præsidentimut qineqqusaarnermit tunuarpoq, USA-mi præsidentimut novembarimi qinersisoqarnissaanit tassa tunuarluni. Biden inoqatinut attaveqaqatigiittarfikkut X-ikkut taama allappoq. Nutaarsiassaqartitsivik AFP taama allaaserisaqarpoq.

- Qinigaaqqinnissara siunertariuarsimavara, partiinnulli nunatsinnullu maanna pitsaanerusoraara tunuaruma, præsidentitullu suliassakka præsidentiunerma sinnerani aallullugit, Joe Biden ilaatigut allappoq.

Innuttaasunut sapaatit akunnerata tulliata ingerlanerani oqalugiarniarnini ilanngullugu nalunaarutigaa.

Joe Bidenip, republikanerit sinnerlugit siuliani præsidentiusoq Donald Trump USA-mi præsidentimut 2020-mi novembarimi qinersisoqarnerani ajugaaffigereeraalu USA-mi 2021-mi januaarip ulluisa 20-annili præsidentiuvoq.

1968-imili aatsaat taamaaliortoqartoq

Biden, USA-mi 1968-imili præsidentiusut akornanni siullersaalluni qinigaaqqinnianngitsutut nalunaaruteqartuuvoq, naak qinigassanngorteqqinnissani periarfissarigaluaraa.

Biden præsidentiusimasorlu Donald Trump ukioq manna juunip ulluisa 27-anni tv-kkut toqqaannartumik oqallitsinneqarmatali præsidentimut qineqqusaarnermit tunuarniuteqarnissamit parteeqatiminit arlalinnit, allaat nuimasunit kaammattorneqarpoq.

Præsidentip 81-inik ukiullip præsidentimut qineqqusaarnissamit tunuarnissaa, USA-mi demokratit sinnerlugit senatorit arlallit, innuttaasullu sinnerlugit sinniisoqarfimmi. tassa Repræsentanternes Husimi ilaasortat amerlasuut tunuaqqusimavaat.

/ritzau/AFP