Akiuussutissartaaq USA-mi sapaatit-akunnerata tulliani atorneqalissangatinneqartoq
Covid-19-imut akiuussutissat pingajussaat USA-mi immikkut ittumik akuersissutigineqangajalerpoq, akiuussutissallu 3 aamma 4 millionit akornanniittut sapaatit-akunnerata tulliani atorneqarsinnaalissangatinneqarput. Præsident Joe Biden naalakkersuisuilu taama ilisimatitsipput.
Nutaarsiassaqartitsiviup Reutersip tamanna uppernarsarpaa, soorlu USA-mi inuussutissanut nakorsaatinullu aqutsisoqarfiup FDA-p, nakorsaatinik nutaanik akuersisartup, tamanna aamma uppernarsaraa.
Nakorsaasiorfiup Johnson & Johnsonip coronavirusimut akiuussutissaliaa matumani pineqarpoq.
AAMMA ATUARUK Joe Bidenip USA-mut tikittut angerlarsimaannarnissaannut piumasaqaatit atulersikkai
Johnson & Johnsonip akiuussutissaliaa EU-Kommissionimit ilimagineqartutut qaammatiip tulliani akuersissutigineqassappat EU-p atorusuppaa.
Nakorsaasiorfiit Modernap Pfizer/BioNTechillu akiuussutissaliaat USA-mi atorneqaleruttorput. Taakku pisariunerupput, atorsinnaassappatalu qerititsivinniittuutigineqartariaqarlutik.
Johnson & Johnsonip akiuussutissaliaa qerititsivimmiittuutigineqartariaqanngilaq, nillartaartitsivimmiittuutigineqarsinnaalluni. Akiuussutissallu allat atorsinnaassappata marloriarluni kapitittoqartassasoq, Johnson & Johnsonip akiuussutissaliaanik ataasiaannarluni kapitittoqartassaaq.