USA suliffeqarfiit aalajangersimasut Huaweimik assuarineqartumik niueqateqartalernissaannut akuersiumavoq

USA-p Kinallu niueqatigeeqqilernissamik oqaloqatigiinnertik ilutigalugu USA-p Huaweimik pillaanini mianersortumik atuukkunnaarsikkiartorpaa.
Ingerlatseqatigiiffiit attaveqatigiinnermut atortunik mianernanngitsunik Huaweimut avammut niueruteqarsinnaasut taamaallaat akuersissuteqarfigineqassapput. Toqqorsivimmit assi Assi © : Open Grid Scheduler/Flickr Creative Commons
Allattoq Ritzau
oktobarip 10-at 2019 14:17
Nutserisoq Hanne Petersen

Amerikami suliffeqarfiit Kinamiut suliffeqarfiutaannik Huaweimik maajimi niueqateqaqqusaajunnaarsimasut ammaanneqaqqilerput.

Aviisimi The New York Timesimi allassimasut naapertorlugit Amerikami oqartussaasut suliffeqarfiit aalajangersimasut tunisassiaminnik Huaweimut tunisisalernissaannut akuersissuteqangajalertussanngorput.

USA-p Kinami suliffeqarfissuaq Huawei attaveqatigiinnermut atortunik nunarsuarmi tunisassiortartuni annersaasoq niueqatigineqaqqusaajunnaartutut maajimi nalunaarutigaa.

Tamanna USA-p Kinallu niueqatigiinnermut isumaqatigiinniarnerminni aaqqiagiinngissuteqarnerisa kingunerisaanik pivoq. Washington D.C-imilu sisamanngorpat isumaqatigiinniaqqissapput.

Huaweip pisisartuminut alapernaarsorsinnaasorimmagu niueqatigineqaqqusaajunnaarsippaa. Tamanna Huaweip assortorpaa, tamatumunngalu atatillugu erseqqissaatigalugu uppernarsaatinik saqqummiisoqarnikuunngisaannartoq.

USA-p inerteqquteqarnera Huaweip Amerikami naalakkersuisuinit akuersissummik peqqaarsimatigani Amerikami ingerlatseqatigiiffiit tunisassiaannik pisiortorsinnaajunnaarneranik kinguneqarpoq.

AAMMA ATUARUK Trump USA-mi nunami ajornartoorfeqarnermik nalunaaruteqartoq

Amerikap niuernermut ministereqarfia suliffeqarfiit tunisassiaminnik Huaweimut tunisisarnissaminnut akuersissuteqarfigineqarnissaminnut qinnuteqaataannik 130-nit amerlanerusunik nassinneqarsimasoq nutaarsiassaqartitsiviup Reutersip aggustimi allaaseraa.

Ingerlatseqatigiiffiit attaveqatigiinnermut atortunik mianernanngitsunik Huaweimut avammut niueruteqarsinnaasut taamaallaat akuersissuteqarfigineqassapput.

USA-p naalakkersuisui niuernermut ministereqarfiup ingerlatseqatigiiffinnut arlaqanngitsunut akuersissuteqarnissaanut sapaatit akunnerani kingullermi akuersipput.

USA-p saniatigut nunat killiit arlallit alapernaarsorfigineqarnissartik ernummatigimmassuk Huaweip attaveqatigiinnermut atortunik nutaaliornissaminut isumaqatigiissusiornissaanut inerteqquteqarlutillu taassuminnga suleqateqarnertik annikillivaat.

Danmarkimi TDC-ip Sverigemi suliffeqarfissuaq Ericsson attaveqaammik 5G-mik ineriartortitsinissamut ukiup matuma aallartinnerani isumaqatigiissusioqatigaa. Tamatumanilu Huawei TDC-ip attaveqaasiaanik 4G-mik ineriartortitsisussaasimagaluartoq aamma eqqugaavoq.

Reutersip Huawei oqaaseqartinniarsimagaluarpaa, iluatsinngitsumilli.

USA Kinalu niueqatigiinnikkut qaammatini 15-ini aaqqiagiinnginnerminni akisaqattaallutik illuatungimik tunisassiaanut akitsuusiisarlutillu akitsuutinik atuutereersunik qaffaasarput.

.