USA silap pissusaa pillugu inatsiseqalerpoq
USA-mi nukissiuuteqarnermut tunngasunut ataatsimiititaliap inatsisissaq akuerisaa tassaavoq gassimik ulorianartumik CO2-nik taagukkanik aniatitsinerup 17 procentimik 2020-ip tungaanut millisarnissaanik siunnersuut, tassa 2005-mi CO2-p aniatissimasap annertussusaata 17 procentianik.
Pisoq assut nuannaarutaallunilu præsidentimut Barack Obamamut ajugaanertut isigineqarpoq, pingaartumik aamma avatangiisit pillugit suliniaqatigiiffinnut, taama alaatsinaattut naliliipput, tamanna DR-ip nittartagaani atuarneqarsinnaavoq.
USA-mi pisoq nunanut allanut sunniuteqassangatinneqarpoq, soorlu Kinamut, gassinik ulorianartunik aniatitsisorujussuit ilagisaannut.
Amerikami innaallagissiorfiit arlallit aamma 2020 nallertinnagu nukissiornerup 15 procentia nukissiuutinit ataavartunit pisalissagaat siunnersuutigineqarpoq, piumasaqaallu taanna EU-mi 20 procentioreerpoq.
Inatsit atuutilersinneqassappat ukiaru USA-mi inatsisartut arlaannit ataatsimiissutigineqaqqaassaaq.