USA: Russit sakkutuuisa amerlasuut Ukraine qimappaat
![](/sites/default/files/styles/image_934x467/public/article_images/20220913-104547-l-5000x3043ma.jpg?itok=91JGLjrY)
Ukrainemi illoqarfiup Kharkivip eqqaa russit sakkutuuinit tiguarneqarsimasut maanna iperarneqarsimasut russillu sakkutoorpassuisa Ukraine qimassagaat, USA-mit nalilerneqarpoq
Amerikamiut sakkuuini atorfilittat qullersaasa ilaat taama oqartoq nutaarsiassaqartitsivik Reuters allappoq.
- Ukrainep kujasissuani kangianilu nunap immioortuisa aningusinnissaannik Ukrainemiut sakkuaanneri ilorraap tungaanut saakkiartortut oqaatigineqarsinnaavoq, atorfilittaq kinaassutsiminik isertuussisoq oqarpoq.
Qeqertarsuup angeqqataa
Russit sakkutuuvisa qasserpiaat Ukraine qimassimaneraat amerikamiup oqaatiginngilaa Kharkivilli eqqaani russit sakkutuuvi tamarluinnangajammik tunuarternerarpai.
Ukrainemi sumiiffiit katillugit 6000 kvadratkilomerterisut annertutigisut tassa Qeqertarsuarmit minnerulaartoq Ukrainemiunit tigineqaqqissimasoq Ukrainep præsidentiata, Volodymyr Zelenskyjip nutaarsiassaqartitsivimmut AFP-mut ataasinngormat oqaatigaa.
AAMMA ATUARUK Zelenskyj: Ukrainemi nuna 2000 kvadratkilometerisut angitigisoq tiguaqqiparput
- Septembarip aallartinnerani sakkutuutta Ukrainep kitaani kujataanilu sumiiffiit 6000 kvadratkilometerisut annertutigisut tigoqqippaat, ingerlaqqippugullu, præsidenti ullormut videoliami oqaaseqartarnermini oqarpoq.
Sjællandimut sanilliullugu Sjælland 7000 kvadratkilometerit sinnilaarlugit annertutigivoq.
Illoqarfik pingaaruteqartoq tiguneqaqqittoq
Illoqarfiit ukrainemiunit tiguneqaqqittut ilaat Izium illoqarfiuvoq pingaaruteqartoq.
Russit illoqarfik qaammatini tallimani kingullerni tiguaqqasimasartik qimanniarlugu sapaatip akunnerata naanerani uppernarsarpaat, illoqarfik taanna russit saassussinerannut aqqutaavoq pingaaruteqartoq.
Nutaarsiassaqartitsivik AFP naapertorlugu Ukrainep akisilluni saassussinermi qaammammi matumani aallartittumi iluatsitsingaatsiarpoq.
Nunap immikkoortuani Kharkivimi illoqarfiit Kupjansk, Baliklija Iziumilu tiguneqaqqittut uppernarsarneqarpoq.