USA Ruslandilu imminnut qanillattulerunarput
Amerikamiut nunanut allanut ministeriugallartup, William Burnsip, oqaasiisa ersersippaat Barack Obamap George W. Bush præsidentitut taarsermaguli nunat pissaanilissuit taakku marluk imminnut qanillinerusut, tamannalu arlalitsigut ersertareerpoq.
Obama russillu præsidentiat, Medjedev, oqarasuaatikkut qanittukkut oqaloqatigiipput, isumaqatigiissutigaallu nunat taakku marluk ungasillinerunnginnissaat anguniassagitsik.
USA-mi præsidentip tullersortaa, Joseph Biden, Münchenimiitilluni sapaatip akunnerata kingulliup naanerani oqarpoq, pereersut puigorlugit Ruslandimut attaveqarneq pitsanngorsaqqinniarlugu. Russillu ilisimatitsissutigaat qaartartunut Kaliningradimi illersuusiorniarlutik pilersaarutertik taamaatiinnarusukkitsik. Amerikamiut qaartartunut illersuusiornissamik pilersaarutaat akineqareersussaagaluarpoq. USA-mili nunanut allanut ministerip tullersortaa russit nutaarsiassaqartitsiviannit, Interfaximit, apersorneqarluni maanna tassa oqarpoq, qaartartunut illersuusiornissamik pilersaarutit allanngortinniaritik, russit pilersaarusioqataaniassammata.
George Bush taamatupajaaq aamma misiliigaluarpoq, tamannali qatangiinnarluni. Ruslandimi nunanut allanut ministeri, Sergei Lavarov, Burnsip oqaasiinut oqaannarpoq: - Oqaasii ilumoorluinnarput! Ilaat neriussimagaluarput qaartartunut illersuusiornissamik pilersaarutit Obamap taamaatitilluaannarumaarai. Pilersaarutilli ingerlateqqinniarlugit oqaannarpoq, kisianni aatsaat isumannaatsuussappata akisuallaassanngippatalu.
Tamanna russit ima paasivaat, Washington isumaqatigiissuteqarallarnissaminut piareersimasoq.
Ruslandimi nunanut allanut ministerip ualigaa uppernarsarpaa, nunat Killiit illersoqatigiiffiat, NATO, sakkunik sakkutuunit atorneqartussaanngitsunik Ruslandip silaannartaa aqqutigalugu sapaatip akunnerata tulliani Afghanistaniliaassuilissasoq.
