USA Pakistanimi tapersersortissaaleqilersinnaavoq.
Amerikami præsidentip illorsuanit præsidenti Bush Musharraf Pakistanimik nunatut demokratii tunngavigalugu ingerlatsivinngortitsisimanera pillugu nersualaarivoq, tamaalilluni peqqarniisaarnianik Al-Qaida-kkunnik, allanillu ingasaassinianik akiuinermut suleqataalluarsimanerarlugu.
USA-llu Pakistanip Musharrafeqarani qanoq siunissami ingerlanissaa ernumanartoqartissinnaavaa, Pakistanimmi peqqarniisaarnianik akiuiniarnermi inissisimanera pingaarluinnartuummat, taama DR-ip USA-mi aallartitaa Steffen Gram Washingtonimiit oqaluttuarpoq.
Musharraf ukiuni kingullerni USA-p peqqarniisaarnianik akiuiniarnermi ikiortigilluarsimavaa, ukiunili kingullerni suleqatigiinneq milligaluttuinnarsimavoq.
Al-Qaidap pingaartumik Pakistanip avannaatungaani sulinerata unitsinniarnera Pakistanimi naalakkersuisunit ajornakusoortinneqarsimavoq, taamaattumillu amerikamiut maanna ikiortissaasualernissaat ilimanarpoq.
USA-mi naliliisartut arlariit assigiinngitsumik isummersorput. Ilaasa peqqarniisaarnianik Talibaninik Al-Qaida-kkunnillu akiuiniarnermi USA-p ajornartorsiulernissaa ilimagigaat ilaasa Pakistanimi oqartussat akiuiniarnermi oqartussaannginnerarpaat, oqartussat tassaanerarlugit USA-mi naalagaaffiup
isertortumik paasiniaasui.