USA-p sakkutuuisa Irakimut isaanerannit ukiut sisamarpiaat qaangiupput
USA-p sakkutuuisa Irakimut isaanerannit, ukiut sisamarpiaat unnuaru qaangiutissapput, kisianni isumasiuinerup nutaap ersersippaa, irakimiut siunissamut isumalluarnerat aatsaat taamak millisimatigisoq.
Amerikamiut sakkutuui 2003-mi marsip 20-anni Irakimut isaapput, irakimiunit aniguisitsiartortutut isigineqarnissartik siunertaralugu.
Kisianni maanna ukiut sisamat qaangiunneranni, irakimiunik isumasiuinerup ersersippaa, irakimiut 82 procentii nunani allamiut sakkutuuinut tatiginnissuseqanngitsut, aamma 86 procentit qanigisamik ilaata peqqarniisaarniarnermit eqqugaanissaa annilaanngatigigaat.
Isumasiuinerit Kitaamiut TV-qarfiinit, BBC siuttoralugu, ingerlanneqarput, isumasiuinerlu 2005-imut sanilliutissagaanni, ajorseriartoqarsimaqaaq. Taamanikkut irakimiut 71 procentiisa ajunngitsumik ingerlallutik oqaatigaat, maannali 39 procentiinnaat isumaqarput ingerlalluarlutik.
Aamma inuit najugaqarfimminni toqqissisimanersut apeqqutigineqarmat, maanna inuit sisamaagaangata ataaseq kisimi toqqissisimasutut misigisimasarpoq. Irakip qiterpasinnerusortaani shia- aamma sunnimuslimit eqqissiviilliorfigisaani toqqissisimannginneq anneruvoq. Tamaanimi qaammatini arlalinngortuni inuit hunnorujulikkaat ullut tamaasa toqunneqartarput. Tamakkua pinaveersaartinniarlugit amerikamiut Bagdadimi iliuusaat taamaallaat killilimmik iluatsissimapput. Tassami shiamuslimit saassussisarneri ikilisinneqarsimagaluartut, kisianni sunnimuslimit ingasattajaarniat suli ullormut arlaleriarlutik saassussisarput.
Tamakkua patsisigalugit amerikamiut angerlarartinneqarnissaat irakimiut suli piffissanngorsorinngilaat, naak tatiginngikkaluarlugit.
Irakimiut 63 procentii isumaqarput nunani allamiut sakkutuui Irakimiikkallartariaqartut isumannaatsuunissap pitsaanerulernissaata suliffeqarfiillu ingerlallualernissaasa tungaannut.
