USA-p nunanut allanut ministeriata sakkuaakkunnaarnissaq kajumissaarutigaa

Akerliussutsiminnik takutitsisut Nalagaaffiit Peqatigiit allaffeqarfiat Beiruthimiittoq aserorterpaat. Akerliussutsiminnik takutitsisut titusintilikkaat, Hizbollahmik muuamaakkut shiamik upperisalinnik tapersersuisut, kamaatigaat Israelimiut Libanon-ip kujataani qaartartunik nakkakaatitsinermikkut illoqarfimmik Qanamik ippassaq saassussinerat sakkujuunngitsut ikinnerpaamik 54-t inuunerannik akeqartoq. Toqutaasut ilagaat ikinnerpaamik meeqqat 23-it.

Akerliussutsiminnik takutitsisut igalaat matullu asertorterpaat arlallillu allafeqarfinnut isaapput aserorterillutillu. Politit sillimanissamillu paarsisut pisunut ungalassimaaginnarput. USA-p nunanut allanut ministeria Condoleeza Rice ullumi Libanonip naalakkersuisui allaffeqarfimmi tassani ataatsimeeqqatigisussaagaluarpai tamannali aamma unitsinneqarpoq.

Libanonimi naalakkersuisut ataatsimiinnissamik unitsitsinerat patsiseqarpoq Israelimiut timmisartukkut saassussinerat kiisalu sakkuaakkunnaarnissamik isumaqatigiissuteqartoqartinnagu ataatsimeeqatiginnikkusunnginneq.

Israelimiut saassussinerisa kingorna Naalagaaffiit peqatigiit generalsekretæriata Kofi Annan-ip Nalagaaffiit Peqatigiit Sillimanissamut Ataatsimiititaliaanut Israelimik assuarlernissaq piumasaraa, piumasaralugulu Libanonimi sorsunneq ingerlatiinnartumik unitsinneqassasoq. USA-p nunanut allanut ministeriata Condoleeza Ricep sakkuaakkunnaarnissaq kajumissaarutigaa