USA-p Hviderusland isornartorsiorpaa

Taama pisoqarnera USA-p nunami tassani demokratiip aamma inuit pisinnaatitaaffiisa "kinguariarnerattut" taavaa.

Tamanna pivoq, suleqatigiiffiup Hvideruslandimi præsidentimik qanittukkut qinersineq sakkortuumik isornartorsioreeraalu, qinersinermi maanna præsidentiusoq Aleksandr Lukasjenko ajugaatinneqarpoq.

Hvideruslandip EU-mit iliuuseqarfigineqarnisssaa, Tysklandimi naalakkersuisut eqqarsaatersuutigigaat, aviisip Süddeutsche Zeitungip nittartakkamini allaaseraa. Tysklandimi naalakkersuisoqatigiinnit oqaaseqartitat kinaassusersineqanngitsut taama oqarsimaneragaapput.

Tysklandilli kansleria Angela Merkel pisoq pillugu EU-mi aqutsisut oqaloqatigeqqaarlugit iliuuseqarniarpoq, Hvideruslandimi aqutsisut nuimasut EU-mut angalasinnaannginnissaat periarfissatut ilaatigut ujartorneqarluni.

Præsident Aleksandr Lukasjenko taakkununnga ilaavoq.

Nunat Killiit taanna Hvideruslandimi sakkortuumik aqutsinerarlugu pisuutippaat, qinersinermilu illuatungiliuttunut sakkortuumik pissuseqarnerarlugu.

Hvideruslandimi præsidentimut decembarimi qinersisoqarmalli Lukasjenkomut illuatungiliuttut arlallit parnaarussaapput, tusagassiutillu isornartorsiuisut matuneqarlutik.

Inuit 600-t missaat qinersinerup nalaani akerliussutsiminnik takutitsisut aamma tigusarineqarput.