USA-p Australiallu aatsitassat oqaluuserissavaat
USA-p nunanut allanut ministeria, Australiami illoqarfimmut Melbournemut ullumi tikippoq. Tikeraarnermini Australiamiut nunanut allanut ministeriannik, isumannaallisaanermut tunngasunik oqaloqateqassaaq. Aatsitassat oqaluuserisassanut aamma ilaajumaartut, USA-p nunanut allanut ministeriata Hillary Clintonip Australiamut tikinnermini oqaatigaa, tamakkumi sakkutooqarnermut pingaarutilerujussuupput.
Amerikamiut nunanut allanut ministeriata ernumanartutut isigaa, Kiinap nunarsuatsinni aatsitassanik qaqutigoortunik niuernerup 95 procentia nakkutigisarimmagu, taakkumi ilaatigut elektronikimik sakkussanillu immikkut ittunik sanaartornermi atorneqartarmata.
- Aatsitassanik tamakkuninnga Australia tunisassioreerpoq, aamma nalunngilara, USA tamakkuninnga annerusumik tunisassiornissamut ilippanaateqartoq. Nunat allat aamma taamatut inissisimapput, Hillary Clinton Ritzauimit taama issuarneqarpoq.
Nunat allat pineqartut Nunarput ilagilluarsinnaavaat, tassami assartuinermut isumalioqatigiissitap siulittaasuata qanittukkut radioaviisimi oqaatigaa, aatsitassanik taamaattunik siunissami tunisassiulersinnaaneq, Kujataata Europallu akornanni timmisartuussinermut aalajangiisunngorsinnaasoq.
