USA-p Afghanistanimi sakkutuuni amerliniarpai

Naasut valmuit aappaluttunik qaqortunillu qalipaatillit sikkerartut ukiup taamaalinerani kusatseruttorput.

Naasulli tamakku ikiaroornartortaat pinerliinianit Talibanit tuniniaanerminni ukiumut 2 milliardi koruuninik iluanaarutigisarpaat.

Ikiaroornartup nunarsuaq tamakkerlugu tuniniarneqartartup 90 procentia Afghanistanimeersuusarpoq.

Ikiaroornartup tuniniarnerani iluanaarutit Afghanistanimi sorsunnermi sakkussarsiutigineqartarput.

Nunat Killiit Illersoqatigiiffiata, NATO-p, Afghanistanip kujasissuani sakkutuuliussaasa pisortaata tulliata, John Nicholsonip, uppernarsarpaa naasup ikiaroornartortaata tuniniarnerani iluanaarutaasut ilumut sakkussarsiutigineqartarnerat.

Taamaasimmat USA-p naalakkersuisuisa aalajangerpaat sakkussarsiutaasinnaasunik tuniniaasartut killilersimaarneqarnissaannut Afghanistanip kujasissuani 20.000-inik sakkutuuliiniarlutik.

Mianersortariaqassappulli. Naatitsisartummi sakkussarsinissaq siunertarinngilaat.

Killeqarfimmili USA-p sakkutuuliussaasa ikiaroornartunik annissiniartut tigusariniartussaassavaat.

John Nicholsonilli nassuiarpaa nunaatillit narsaataanni Talibanit qaartartulersuisarsimasut, taamaammat saassussinissaminnut peqqutissaqarnerarluni.

Afghanistanip kujasissuani naasorissaasut inuussutissaqartiinnassallugit periarfigisinnaasaat tapersersorniarlugu USA ukiumut 1,2 milliardi koruuninik aningaasaliisarpoq, killeqarfiullu qanittuaniittut naasorissaasut allamik periarfissinniarlugit 1 milliardi koruuninik saniatigut aamma tapiissuteqartarluni.

Ikiaroornartumilli tuniniaanerup killilersorneqarsinnaannginnera ilisimaarineqarpoq; tuniniaanerilluunniit nakkutiginiarneqaraluarpata Taliban naammattunik iluanaaruteqartuaannarpoq.