USA: Qulaavaasoq nakkutilliinermut akornutaammat nakkartinneqarpoq
Qulaavaasoq suussusersineqanngitsoq USA-p kangimut avannaani tatsip Lake Huronip eqqaani nakkartinneqarpoq. Lake Huron USA-p Canadallu killeqarfiata nalaaniippoq. Qulaavaasoq suussusersineqanngitsup kilitsissiatut sulinermut atorneqarsimasinnaanera pasitsaanneqarpoq.
USA-p illersornissamut ministereqarfiani Pentagonimi atorfilittat ilaat nutaarsiassaqartitsivimmut Reutersimut taama ilisimatitsivoq.
AAMMA ATUARUK Avataarsuani suussusersineqanngitsoq Canadap nalaaniittoq aallaaneqarluni nakkartinneqarpoq
Qulaavaasoq suussusersineqanngitsoq uloriananngitsutut nalilerneqartoq, atorfilittap nassuerutigaa.
Nunalli iluani timmisartuussisarnermut ulorianarsimasinnaavoq, 6,1 kilometeritummi qutsitsigisumiimmat.
Qulaavaasoq suussusersineqanngitsoq saneraani allunaasaqartoq oqaatigineqarpoq. Taannali assartugaqanngitsoq, Pentagonimi atorfilittap oqaatigaa.
Qulaavaasoq suussusersineqanngitsoq alla qanittukkut USA-p silaannartaatigoorpoq, USA-llu kangimut sineriaani South Carolinap avataani nakkartinneqarluni. Qullartaasiaasimanissaa tassani oqaatigineqarpoq.