USA naqqiuteqarpoq: illersornissamut isumaqatigiissutip isumaqatiginninniutigeqqinnissaa pilersaarutaanngikkallarpoq
Qinersinerup unnuani pisoqarsinnaaqaaq - aamma aqaguani ullaakkut.
USA-p Københavnimi naalagaaffinnut allanut oqaasissaqartussatut aallartitaqarfiani oqaaseqartartoq, Gavin Sundwall, ippassaq oqaatigineqartumut maanna naqqiivoq.
- Illersornissamut isumaqatigiissummut maannakkuugallartoq isumaqatigiinniuteqartoqanngilaq aamma isumaqatigiinniartoqarnissaanik pilersaartoqanngitsoq erseqqissarusuppara, Gavinn Sundwall oqarpoq.
Aamma atuaruk USA-p illersornissamut isumaqatigiissut isumaqatigiinniutigeqqikkumagaa
Permanent Comitteekkooqqaassaaq
USA-p Nunatsinnut Danmarkimullu illersornissamut isumaqatigiissutaat isumaqatiginninniutigineqaqqinnissaanut piareersimalluni, piffissarlu eqqorpat isumaqatigiissut allanngortinneqarsinnaasoq, USA-p aallartitaa, Rufus Gifford KNR-imut ippassaq oqarpoq.
Taamatulli oqarnera, Gavinn Sundwallimit naqqinneqarpoq.
Isumaqatigiissut Pituffimmut, amerikamiullu Pituffimmiinnerannut ilaatigut tunngasoq, Siumumit IA-miillu allanngortinniarneqarpoq.
Nunarpulli Danmarkillu isumaqatigiissut allanngortinniarpassuk, nunat pingasut sinniisoqarfianni Permanent Committeemi pisortatigoortumik qaqinneqaqqaartariaqartoq, Gavin Sundwall oqarpoq.
- Kalaallit Nunaanni Inatsisartuni ilaasortat pisortatigoortumik qaqippassuk, Danmarkimiillu isumaqatigineqarluni, Permanent Committeeqarpugut, tassani pineqartumut assingusut oqallisigineqartarneri naliginnaasuummata, Gavin Sundwall oqarpoq.
Aamma atuaruk VIDEO Exelisip aalajangiiffigineqarnera Vittup periarfissanik nutaanik ammaassisinnaassanasoraa
Sundwall: Isumaqatigiissut maanna atuuttoq ajunngilaq
USA illersornissamut isumaqatigiissut isumaqatiginninniutigeqqinnissaanut ammasoq Gavin Sundwallip aamma ersersinniarpaa, taamaattoqarnissaali USA-mit maanna tulluarsorineqanngitsoq aamma oqarluni.
- Isumaqatigiissut atuuttoq aalajaakkallartoq isumaqarpunga. Nunanut sammisat pingaaruteqartut peqataasuniillu soqutigineqartut isumaqatigiissummi sammineqarput, Gavinn Sundwall oqarpoq.
USA, Nunarput Danmarkilu peqatigalugit suleqatigiissitaliorsimapput, ilaatigut amerikamiut Pituffimmiinneranut samminnittumik.
