USA-mut aqqut ammaannaqaaq
Air Greenlandip USA-mi Baltimoremut aqqut nutaaq ullumikkut maajip ulluisa 24-anni aallarnissavaa.
Air Greenlandip timmisartorsua, Kunuunnguaq, Kangerlussuarmiit ullaatungaa nalunaaqutaq qulip-qeqqanut aallassaaq, nalunaaquttallu akunneri tallimangajaat qaangiuppata Baltimorep mittarfissuanut missalluni. Aqqut nutaaq atorlugu siullermeertumik USA-p Kalaallillu Nunaata akornanni toqqaannartumik ingerlasoqarsinnaanngorpoq.
USA-mut aqqummik aallarnisaaneq ippassaq pingasunngornermi maajip ulluisa 23-anni Danmarkip Washingtonimi aallartitaqarfiani ilasseqatigiissutigineqarpoq, Namminersornerullutik Oqartussat ilaatigut peqataaffigisaannik.
Ullumikkut timmisartuusseqqaarnissaq Kunuunnguup Kangerlussuup tungaanut aallannginnerani Baltimorep mittarfiani mittarfiup Air Greenlandillu aaqqissuussaannik malunnartinneqassaaq, taamatullu Kangerlussuarmut unnugu nalunaaqutaq qulingiluanut mippat Air Greenland aamma ilasseqatigiissitsissalluni.
USA-miit Kangerlussuarmut ilaatigut Joint Committeemi, Kalaallit Nunaata USA-llu akornanni suleqatigiiffianni ilaasortat USA-meersut ilaassapput, Ilulissani sapaatip akunnerata naanerani ataatsimeeqatigiissallutik.
Baltimoremut sapaatip akunneranut ataasiarluni juunip qeqqata tungaanut ingerlasoqartassaaq, piffissamilu angallaffiunerpaasumi, tassa juunip qeqqaniit aggustip naanerata tungaanut, sapaatip akunneranut marloriartassalluni, ataasinngornikkut sisamanngornikkullu.
