USA milliardilikkaanik amigartooruteqartussanngorpoq

USA suli aningaasarliorpoq, præsidentip Barack Obamap aningaasanut inatsisissatut nutaatut siunnersuutaata, pingasunngormat saqqummiunneqartup, tamanna takussutissaqartippaa.
Allattoq Apollo Jeremiassen
februaarip 02-at 2010 07:28

Amigartoorutissatut siunnersuutigineqartut 1560 milliardit dollariupput imaluunniit danskit aningaasanngorlugu 8300 milliardit koruunit.

Naalagaaffimmit aningaasalersorneqartut suliassat pilersaarusioriikkat piviusunngortinneqassanngillat. Tamakku ilagaat Nasap qaammammukartitsinissaagalua.

Ukiuni tulliuttuni aningaasat assigiinngitsorpassuarnut atorneqartussat aalajangersarneqassapput. Taamaattorli illersornissamut aningaasartuutit aammalu naalagaaffimmi atorfillit utoqqalinersiutaat allanngortinneqassanngitsut Obamap pilersaarutigaa. Ukiumut 250.000 dollarinik sinneqartunik aningaasarsialinnut akileraarusiinissani pilersaarutitut saqqummiussassaata ilagai.

Aningaasanut inatsit sipaarniarnerinnaanngilaq. Ilinniagaqarniarnermi aningaasartuutit 6 procentimik amerlineqarnissaat Barack Obamap siunniussaannut ilaavoq. Taassuma oqaatigaa, kinguaariit tulliuttut pisinnaaneri qaffassarneqartariaqartut, nunanut allanut unammillersinnaassappata.

Aningaasanut inatsisissap siunnersuutigineqarnera Kongresse-mit akuerineqaqqaartussaavoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq