USA-mi universitetit pitsaanersat ilaat kalaallinik ilinniartoqalerusuppoq

USA-mi universitetit pitsaanerpaat ilaanneersut inuit tallimat maanna Nuummiipput. Taakkua naalagaaffimmi New Hampshiremi Dartmouth Universitetimeersut Nunatsinnik suleqateqalerusupput, nunatsinneersunillu ilinniartoqalerusullutik.

Universiteti 1761-imi tunngavilerneqarpoq, tamaani indianerit suleqatigiumallugit ilinniartikkumallugillu. Universiteti aallartinnerminiit indianerit nunallu inoqqaavi pingaartillugit ingerlatsisimavoq, nunallu inoqqaavinut sammisumik ullumikkut ilinniartoqarsinnaavoq.

Taama oqaluttuarpoq Marianne Stenbæk, ukiup affaani kingullermi universitetimi ilisimatuutut sulisoq, Nuummullu angalaqataasoq.

Kalaallit Nunaannik suleqateqarusuppugut, tassa universitetip ilaata Dicky Institutip siunertarigamiuk inuiaqatigiinni pissutsinik inissisimanerinillu ullumikkut paasinninnerunissaq. Tamakkununngalu tunngasunik suliaqarusukkamik. Soorlu maanna samminiarneqarput silap pissusaata allanngoriartornera, tamatuma inunnut sunniutai ilanngullugit.

Kalaallit universitetimi ilinniartunngorunik suna pissarsiarissaneraat Marianne Stenbæk aperineqarami akivoq, soorunami fagitigut pissarsiaqaatigissagaat, soorlu inuup inuiaqatigiillu pissusiinik ilisimatusarnermi, kulturimut tunngasuni kiisalu oqaatsitigut ilisimatusarnermi. Peqatigisaanik amerikamiut universitetianni inooqatigiinnikkut inuiaqatigiinnilu pissutsinik pimoorussineq, inuiaqatigiinnut tunngasumik iliuuseqarusunneq kiisalu nunap inoqqaavinik suleqateqarneq ingerlanneqassapput, soorlu ukiuni kingullerni 250-ini tamanna ingerlanneqareersoq. Tamanna inuusuttunut misigisassaavoq angisooq. Aammattaaq universiteti tusaamaneqarluartuuvoq, Amerikamilu universitetit pitsaanerpaat qulit akornanniilluni. Tassa ilinniartut pitsaalluinnartumik ilinniagaqassapput, Marianne Stenbæk oqarpoq.

Marianne Stenbækip manna tikillugu isumaqatigiissutaanerarpaa kalaallimik ataatsimik Dartmouth Universitetimi ukiamiit ilinniartoqalissallutik.