USA-mi siuttut nannut eqqissisimatitaanissaannik inatsisiliorput
USA-mi naalakkersuisut – præsident George W. Bush siuttoralugu – ullumi saqqummiutissavaat Alaskami nannut eqqissisitaanissaannik inatsisissatut siunnersuut, utaqqineqarsimaqisoq. Tamatumunnga patsisaavoq silaannaap kissatsikkiartornerata nannut uumaffiinnut sunniutai – aamma inatsisissatut siunnersuut USA-p avatangiisinut politikkianut sunniuteqartorujussuusinnaasoq, aviisimi Washington Post-imi taama allaaserinnittoqarpoq.
Tamatumunnga patsisaavoq – aviisi naapertorlugu – inatsisissaq Amerikamiut silaannarmik mingutsitamik CO2-mik killilersuinissamut piuminaalliornerannut naalakkersuinikkut assut sunniuteqarsinnaanera.
Tassami nanoq meeqqanit nuannarineqartorujussuuvoq – Coca Colap juullimut ussassaarusiaani ilaatinneqarpoq – Amerikamiullu eqqarsartarnerannut pingaarutilimmik sunniuteqarluni.
Buship allaffeqarfianit nannut nungutaanissaat inuit pilersitaannut CO2-mik aniatitsinermut taputartuunneqarpat, alloriarneq tulliuttoq tassaasinnaavoq, naalakkersuisut piumasarileraat Amerikamiut suliffissuaqarnerata biilillu CO2-mik aniatitsinerisa killilerniarneqalernerat.
Washington Postimi allaaserisaq naapertorlugu nannut 25.000-iusut ilaat 4.700-t Alaskami uumasuupput.
