USA-mi sakkutuukillisaasoqassaaq pisuullu akileraarnerulissallutik

USA-mi præsidentitut Obamap qinigaaffia siulleq 2013-imi naasussaavoq, qinigaaffinnilu naatinnagu USA-mi aningaasartuutissatut amigartoorutit affaannanngortinneqarnissaat Obamap anguniarpaa.

Naalagaaffiup aningaasaataasa ungasinnerusoq eqqarsaatigalugu oqimaaqatigiinnerusumik inissisimanissaat Obamap taamaaliornermigut ersersippaa, naak aningaasarsiornikkut annertuunik atuiffiusunik suliniuteqaraluarluni, siunissami aningaasarsiornikkut oqimaaqatigiinnerup pisariaqarnera pingaartippaa.

2010-mut aningaasanut inatsisissatut siunnersuummik Obamap naalakkersuisuisa sisamanngorpat saqqummiussinissaat naatsorsuutigineqarpoq.

Illersornissamut aningaasartuutinik sipaarniuteqartoqarnissaa ilimagineqarpoq, ilaatigut Irakimi suliniutit annikillisaaffigineqarniarmata.

Tamatuma peqatigisaanik Amerikami aningaasatigut isertitaqarnerusartut akileraarutaasa qaffanneqarnissaat kissaatigineqarpoq.

Aningaasatigut ikiorsiissutit ataatsimoortut 4650 milliardit koruuninik naleqartut sapaatip akunnerata siuliani akuersissutigineqaraluartut, missingersuusiornermi amigaartoorutit 5920 milliardit koruuniunissaat USA-mi naalakkersuisut naatsorsuutigaat.