USA-mi præsidentimut tulliusimasoq eqqartuussivimmut tunniunniarpaat
Cheneymut allagaq unnerluutiginnissut sapaatip akunnerata tulliani piariissangatinneqarpoq.
Nigeriami atorfinni ileqqorlunnermut akiuisut unnerluussisuini oqaaseqartartup oqaatigaa akiliilluni peqquserlutsitsisimasutut suliassanngortitsineq Dick Cheneyp Amerikamiut uuliasiorfianni Halliburtonimi pisortatut atorfigisimasaanut attuumavoq. Cheney præsident George Buship nalaani præsidentimut tullinngunnginnermini Halliburtonimi pisortaasimavoq.
Nigeriami suliami gassimik nunap iluaneersumik qalluinermi Halliburton 1,1 milliardit koruuningajannik 1995-imiit 2005-imut peqquserlutitsilluni akiliisimanerarneqarpoq.
Piffissap taassuma affaata missaani Nigeria sakkutuunit soqqusaatsumik naalakkersorneqarpoq, politikkikkut akerliusunik toqoraasartunit.
Unnerluutiginninnerit Halliburtonip akerlilerpai, suliffeqarfiulli taassumalu Nigeriami piginneqatigiiffiata, ukioq kingulleq 3,3 milliardit koruuninik suliamut pillaatitut akiliivoq. Nunani allani akiliilluni peqquserlutitsisimasutut Amerikamiut suliffeqarfiata pillaammik akiliisimanerisa annersaraat.
Uuliasiortitseqatigiiffik Shell Nigeriap akililluni peqquserlutitsisimasutut suliami misissuinermini aamma misissugaraa. Nigeriamiut oqartussaasa Halliburtonimi Shellimilu nunami pisortai killisiorsimavaat. Amerikamiullu inatsisinik atortitsinermut ministeriaqarfiata suliffeqarfinnut taakkununnga marlunnut unnerluutiginnissutit misissorpaat, suliffeqarfiit taakku akiitsuuserisunut oqartussat, nioqqutissanik eqqussisinnaanermik inatsisit avaqqunniarlugit ilaatigut uulianut qilleriviliat nunamut ajornannginnerusumik sukkanerusumillu eqqussinnaajumallugit, millionilikkaanik akilerlugit peqquserlutsitsisimasutut unnerluutigineqarput.
