USA-mi nukissiuutinik nutaanik ujartuinialerput
USA-p ikummatissanik uuliameersunik aamarsuarneersunillu atuinerminik aamma immami uuliasiorluni qillerinernik sooq minnerulersitsisariaqarnersoq, uuliamik maqisoornerup ersersilluaraa, præsidentip tikkuarpaa, tamakkununngalu taarsiullugu gassit pinngortitameersut isiginiarneqarnerusariaqartut.
Præsident Obamap neriuutigaa, Mexicop Kangerliumanersuani uuliasiornikkut ajutoorneq pissutigalugu, Amerikami silap pissusaanut tunngatillugu inatsisissamik illersuinerup annerulernissaa neriuutigaa.
Oqalugiarnermini oqaatigaa qaammatini tulliuttuni silap pissusaanut tunngatillugu nutaamik iluarsartuusseqqittoqassasoq. Tamatumanilu siunertarisani arlaleriarluni uteqattaarpai makkuusut: Immami uuliasiorluni qillerinerit ikinnerussasut, uuliasioqatigiiffissuarnut akileraarutitigut oqilisaassineq, taamaalillutik aamarsuarnut taarsiullugu gassimik pinngortitameersumik atuinerulerniassammata.
Obamap oqalugiaammini silap pissusaanut inatsimmik allannguinissaq eqqaavaa. Tamatumalu anguniarnissaanut partiit suleqatigiittariaqarnerat eqqaallugu.
Uuliasiornermi ajutoornermut atatillugu Obamap BP-p qanoq akisussaaffeqartiginera kisiat oqaluuseriunnaarlugu allanik saqqummiussinnera tunuliaqutaasa nuannaarutigaat.
Tassami præsidentip tunuliaqutaasa kissaatigineruaat Obamap uuliasiornermi ajutoorneq samminerussagaa, taamaalillunimi silap pissusaanut inatsisip allanngortinniarnissaanut innutaasut isummertikkuminarnerussammata.
Immikkut ilisimasallit arlallit naliliipput, tamanna ajornakusuussaqisoq, tassami USA immami qillerilluni uuliasiornermut akisussaaqataasorujussuummat, uuliamimmi pilersorneqarnerisa 40 procentiat immami qillerilluni uuliasiornermit pissarsiarineqartarmat.
Præsidentip kongressimi tapersersortissarsiornissani ajornakusoortissaqaa, tassami oqalugiariitsiaannartoq Republikanerit oqalullutik aallartipput, præsidentip inatsisissatut siunnersuutini illersorniaannarlugu, uuliasiornermi ajutoorneq atorluarniarsarigaa.
