USA-mi nukissiuuteqarnermut politikki nutarterpaa
Obama ima oqarpoq:
- Imaani uuliasiornerup gassisiornerullu misissuiffigineqarnerisa annertusinerat ullumi nalunaarutigaarput, kisiannili nunami namminermi nukissiuutitut isumalluutit atorneqarnissaannik pisariaqartitsinerup Amerikamilu pinngortitap pisuussutaasa illersorneqarnissaannik pisariaqartitsinerup akornanni oqimaaqatigiissitsinikkut.
Pinngortitamik illersuiniaqatigiiffiit sumiiffinni qilleriffissanut Barack Obamap kissaatigisatut taasaanut akerliusorujussuupput, tassami sumiiffinni taakkunani aalisartoqartarmat tamaanilu uumasorpassuaqarluni.
Sunaliuna Obamap maannakkut akuersissutigitinniaraa? DR-ip Washingtonimi ilanngutassiortua Claus Fahrendorff ima akivoq:
- Nutaartaasoq tassaavoq Atlantikup sineriaani New Yorkimiit Florida tikivillugu Mexicollu kangerliumanersuani immaqa pingaaruteqarpallaanngikkaluartumi Alaskallu avannarpasinnerusortaani qillerisarnissat akuersissutigitinniarmagit. Nunallu ilaa tamanna avatangiisit pillugit assortuussutaasarsimaqaaq, tamakkuuppullu præsidentip siuliata George Buship siunnersuutigisimasaanut assingusut, aamma George Bush akerlerineqartorujussuusimammat, tassami taanna inuttut qinikkaminngarnit uuliasiortutut inunnit isigineqarsimammat, taamaalillunilu tamanna Obamamut annernassalluni, tassami nammineq saamerleqataasa appisaluutinngitsoorunanngimmassuk, Obamali imminut illersorpoq biilinik atorluaanerunissaq kingullermillu sakkutuut timmisartuisa nunakkoorutaasalu aammattaaq ethanolimik ingerlateqalernissaat atuuttussanngortikkamigit.
Nukissiuuteqarnikkut politikkip allanngortinneratigut Obamap politikkikkut akerlerisani sila pillugu nutaamik inatsisip maannakkorpiaq Senatimi uninngaannalersimasoq pillugu isumaqatiginiassavai, DR taama tusarliussivoq.
