USA-mi naalagaafffiup Issittumut attaveqarnini Norgemi Tromsømi allaffeqalernikkut nukittorsaraa

USA-mi atorfilittatigut Norgep avannaani Tromsømi attaveqalerniarluni allaffeqarfik ammarniarpaa. USA-p nunanut allanut tunngasunut ministeria Antony Blinken Norgemi tikeraarnermi nalaani taama nalunaaruteqarpoq.

Tromsø qaasuitsup killeqarfianit avannamut inissisimavoq, USA-llu tassani allaffeqarfia USA-p nunani allani allaffeqarfiini avannarlerpaassaaq.

Issittup isumannnaallisaaniarnermi silallu pissusiata allanngoriartornerani pingaaruteqaleraraluttuinnarneranik tamanna takussutissaavoq.

USA sinniisoqarfimmik Nuummi 2020-mi ammaavoq.

- USA-p Tromsømi nammineq allaffeqarfeqalerniarnera matumuuna nalunaarutigaara. Atorfilittatigut nunani allani attaveqarniarnitsinni avannarlerpaassaaq, Blinken, nunat killiit illersoqatigiiffiata NATO-p Norgep illoqarfiisa pingaarnersaanni Oslomi ataatsimiinnerisa nalaanni tusagassiortunik sisamanngornermi katersortitsinermi oqarpoq.

- Issittup eqqissinartumik suleqatigiiffiujuaannarnissaa pingaartipparput. Issittoq unammillernarsiartuinnarpoq, illersorneqarnissaalu pingaaruteqarpoq, tamanna aalajangiusimalluta sulissutiginiarparput, taanna oqarpoq.

Issittup pissanganartorsiorfiunerulerneraniittugut, Tromsøp borgmesteriata Gunnar Wilhelmsenip, Arbeiderpartietimeersup, oqaatigaa, USA-llu allaffeqarfimmik ammaaniarnera tikilluaqqullugu:

- Issittumi pissanganartorsiornerulersimanitta amerikamiut sinniisoqarfimmik Tromsømi ammaanerannik takussutissaavoq. taanna oqarpoq.

Atorfilittaq maannamut ataaseq USA-p Tromsømi allaffeqarfittaavani sulilissaaq.

Rusland Kinalu Issittumi unammilligassaaneruleriartortutut isigineqarput, Ruslandillu Ukrainemik saassussinerata kingorna tamanna annerulerluni.