USA-mi inupiluit paasisaapput
Inupiluit taakku aqqanillit kortit akiliissutit paasissutissartaannik 41 millionit sinnerlugit amerlatigisunik tillissimasutut unnerluutigineqarput, tillitatik taakku tuniniaqqissimavaat.
Qarasaasiamik angallattakkamik nassataqarlutik inupiluit angalasarsimagunarput. Qarasaasianik imminnut atassusikkanik aqquteqanngitsunik ujaasisarsimapput, taamaattunillu pisiniarfinni nassaarunik programminik ikkussuisarput, pisiniartartullu pillugit paasiniaasarlutik.
Tupinnaqutaalu uaniippoq, inupiluit ilaat Secret Service-mi paasissutissiisartutut atorfeqartuummat, unioqqutitsillutik allat qarasaasiaannut pulasartut taakkorpiaat ujaarineqarneranni sulisunut ilaasoq. Nittartakkap siulliup, allat kinaassusaannik kortinillu akiliissutinik ingerlatitseqqissimasup, ujarneqarnerani taanna peqataasimavoq.
Secret Service-p paasiniaanera pillugu pinerluttunut aamma ingerlatitseqqiisarsimasoq kingusinnerusukkut aamma paasineqarpoq.
Unnerluussisut naapertorlugit inuit taakku aqqanillit unioqqutitsillutik qanoq aningaasarsitigisimanersut oqaatigissallugu suli siusippallaarpoq, unioqqutitsillutilli allat qarasaasiaannut pulasartut, kinaassutsinillu tillittartut, manna tikillugu nassaarineqartut, eqqartuussisutigoortitsinerillu, maannamut annertunersarigaat, USA-mi inatsisinut atortitsinermut ministereqarfik isumaqarpoq.
