USA-mi innermik anitsisartorsuaq ilimagisamit anginerujussuusoq

USA-mi innermik anitsisartorsuaq nunap eqqissisimatitap Yellowstone'p ataaniittoq ilisimatuutut misissuisut paasisimavaat ilimagisamit anginerujussuusoq. Innermik anitsigaluarpat nunarsuarmi klima tamaat sunniivigilluarsinnaangaa ilisimatusartut nalunaarput.
Allattoq Karsten Sommer
decembarip 13-at 2013 08:23

Ajunaarnersuarmik kinguneqarsinnaavoq, Yellowstone supervulkani innermik anitseriataaraluarpat.

Misissuinerit nutaat takutipaat innermik anitsisartoq ilimagisamit anginerujussuusoq.

Paasisaq uissuumminartuuvoq, professor Buck Smith Utah'p Ilisimatusarfianeersoq oqarpoq.

Nalunaarsuutit nutaat takutippaat anngaq nunap eqqissisimatitap ataaniittoq ilimagisamit annertunerujussuusoq.

Ilisimatusartut seismografi atorlugu nuna eqqissisimatitaq tamaat misissuiffigisimavaat uuttortarniarlugu innermik anitsisartup anngaasivii qanoq annertutiginersut. Tamakku nunap qaavaniit taamaallaat 9 kilometerisut atsitsigisumiipput.

Misissueqqissaartut missingersorpaat innermik anitsisartup anngaasivii siullermik naatsorsuutigisamiit marloriaammik annertutigisut.

Innermik anitsisartoq taamaalilluni silarsuarmi ulorianarnerpaanut ilannguppoq.

Qaqugu anitseqqissanersoq ilisimaneqanngilaq. Kingullermik anitsivoq ukiut 640.000-it matuma siorna. Immikkut ilisimasallit isumaqarput anitsisarneri ukiunik 700.000-nik akuttussuseqartut, anitseqqinnissaalu ungasippallaanngitsoq. Allat isumaqarput  tullianik qaqugu anitsissanersoq naatsorsorniaraanni paasissutissanik suli amigaateqartoq.

Unali isumaqatigiissutigineqarpoq;  innermik anitsisartoq tullianik anitsippat Amerika Avannarleq tamarmi suujunnaarsinneqassasoq, nunarsuullu sinnerani tamarmi klima allanngorujussuassasoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq