USA-mi Inatsisartunut ilaasortanit Ilulissanut tikeraartoqaqqilerpoq
Iluliarsuit illorsuarujussuartut angitigalutillu portutigisut Ilulissat kangerluannit imaanut avalagarput, siornatigornit marloriaammik sukkanerullutik. Sermersuarmiit imeq imaanut kuuttoq, nalunaaquttap akunnerini 24 tiimit kuukkaangat, New Yorkimi imeq ukiumut atorneqartartoq annertoqatigisarpaa.
Ilulissat Kangerluani sermip uukkaaviata USA- mi Grand Canyon nunatussutsimigut angeqqatigaa.
Amerikamiut kongresianni ilaasortat aqqanillit, sapaatip akunnerani kingullermi taavaniipput, tallimanngorpamiillu Amerikami inatsisartunut ilaasortat qulit, amerikamiullu politikikkut upernaaq maajimi aallartitaat, inatsisartuni siulittaasunngorlaaq arnaq, Nancy Pelosi, ilaatigut siuttoralugu Ilulissat Kangerluanni sermip uukkaavia alakkartertualerpaat.
Danmarkimi USA-p aallartitaqarfiani oqaaseqartartoq aperaarput, USA-mi qaffasissunik atorfillit Ilulissat Kangerluat sooq alakkartertualerneraat?
Isumaqarpunga silaannaap allanngoriartornera nammineerluni takussallugu pingaaruteqartoq!
Aallartitat Ilulissiartarput sermersuup uukkaavia alakkarterlugu, danskit politikerii kiisalu Namminersornerullutik Oqartussanit sinniisuutitat naapittarlugit.
USA-mi politikerit amerlanersaat namminneq suliniuteqarnermikkut Ilulissiartarput, Avatangiiseqarnermullu ministeri Conny Hedegaard angallassisoralugu USA-mit aallartitat ulluni aggersuni Ilulissaniissapput.
USA-mit paasiartorneqalerpoq silaannaap allanngoriartornera USA-mit peqataaffigineqartariaqartoq. Soqutiginninnerup alliartornera takuneqarsinnaavoq Inatsisartuni siulittaasup Nancy Pelosip maajip qaammataani Ilulissaniimmat, sermip uukkaavianut alakkarterereernerata kinguninnguatigut, USA-p avammut oqaaseqartarnera allatut nipeqalerpoq. Nunallu tamat akornanni tusagassiortunut oqaaseqarami oqarpoq, maannamiit ilumoorullugu USA silaannaap allanngoriartorneranut tunngatillugu qanoq iliuuseqartariaqalernerarlugu.
Conny Hedegaardip naggataatigut oqaatigaa,
USA-p silaannaap allanngoriartorneranut tunngatillugu pingaarnertut isiginninnera aqilisinneqartariaqartoq, USA paasinnereerpat Kina Indialu tulliullugit oqaloqatigineqarumaarput.
