USA-mi ikaartarfiit nakkaattooriaannaat
USA-liassaguit ikaartarfikkut ikaarnialeruit aqqaamasariaqarputit.
Tassami USA-mi ikaartarfiit 600.000-iusut sammineqartorujussuanngorput, Minneapolisimi ikaartarfik bilerpassuarnit aqqutigineqartartoq kuussuarmut Mississippimut ippassaq nakkakaatereersorlu, tassanilu ikinnerpaamik inuit sisamat ajunaarput.
Maanna paasinarsivoq USA-mi ikaartarfiit 75.000-iusut sananeqaataat apeqquserneqartut, taakkuami ikaartarfittut ippassaq nakkakaattutut sananeqaateqarput.
1990-imi angallannermut oqartussaasut ikaartarfik “sananeqaatimigut amigaateqarnerarlugu” oqaatigaat. Taamatut taaneqarmat imaanngilaq ikaartarfik qajannartuusoq.
Taamaattorli tv-qarfik CNN naapertorlugu USA-mi ikaartarfiit sisamararterutaat naatsorsuutigisamit bilinit amerlanerusunit aqqutigineqartarput. Ikaartarfiit taakkua 75.000-iusut iluarsaanneqarnerat ukiunik 20-nik sivisussuseqassaaq danskillu koruuniinik 50 milliardinik akeqassallutik.
Ippassaq ajutoornerup kinguneranik Minnesotap guvernøriata naalakkiutigisimavaa naalagaaffimmi tassani ikaartarfiit tamarmik ippassaq nakkakaasup assingi misissoqqissaarneqassasut.
