USA-mi angerlarsimaffeqanngitsut amerlasuut sakkutuujusimasarput
Ilarpassui sorsunnerni maanna suli ingerlanneqartuni, Irakimi Afghanistanimilu sorsoqataasimasarput. Amerikamiut inersimasortaasa 11 procentii sakkutuujusimasuupput, taakkuli nerisassallerfiusartuni kialaarfiusartunilu takkuttartut 25 procenteraat, aviisi Politiken taama allaaserisaqarpoq.
Vietnamimi sorsoqataasimasuinnaanngitsut, inuiaqatigiinni inooqataajunnaartarput aqqusinermilu inuulerlutik. Angerlarsimaffeqanngitsut ilarpassui Irakimi Afghanistanimilu sorsoqataasimasarput. Sakkutuujusimasunik angerlarsimaffeqanngitsunik ikiuiniaqatigiiffiit tamanna ernumanartoqartippaat. Tassami Irakimi Afghanistanimilu sorsoqataasimasut allanut naleqqiullutik angerlarsimaffeerutiaarnerusarput.
Vietnamimi sorsoqataasimasut angerlarneranniit ukiut qulit qaangiummata aqqusinermi angerlarsimaffeqanngitsutut takussaalerput, kisianni sakkutuut sorsuffiusunut arlaleriarlutik nassiunneqarsimagaangamik sunnertiasunngortarput, imaannaanngitsunillu ajornartorsiuteqalersarlutik.
- Taakkua 45 procentii tarnimikkut napparsimasuupput, sisamaagaangatalu pingasut atornerluinermik ajornartorsiuteqartarput. 35 procentiisalu taakkua marlunngorlugit ajornartorsiutigaat, Pete Dougherty, sakkutuunut angerlarsimaffeqanngitsunut suliniaqatigiiffimmi siuttuusoq nassuiaavoq.
