AP: USA Kalaallit Nunaanni ataavartumik aappaagu sinniisoqarfeqalissaaq
USA-p nunatsinni sinniisoqarfiata Nuummi aappaagu ammarneqarnissaa pilersaarutaasoq nutaarsiassaqartitsiviup allaaseraa.
USA-p nunatsinni sinniisoqarfeqaqqilernissaa USA-p kissaatigigaa, USA-p nunanut allanut tunngasunut ministeriata Mike Pompeop ukioq manna maajimi nalunaarutigaa.
- USA-p Kalaallit Nunaanni sinniisoqarfeqalernermigut Issittumi takussaanerulernissani qulakkiissavaa, USA-llu Kalaallit Nunaannni soqutigisaanut iluaqutaassalluni. USA-p nunanut allanut tunngasunut ministereqarfia taama allaaserisaqarpoq.
Issittup USA-p politikkikkut suliniuteqarneranut aningaasarsiorneranullu pingaaruteqarnera, Issittumilu takussaanerulernissaata nukittorsarneqarnissaanut soqutiginartuunera avaqqunneqarsinnaanngitsoq, ministereqarfiup ilanngullugu oqaatigaa.
Siusinnerusukkut pilersaarutit annertuarniarneqarput
Atorfilittaq Sung Choi, USA-mit maajimi atorfinitsinneqarpoq. Kalaallit Nunaata USA-llu akornanni atorfilittatigut suleqatigiinnerup nukittorsarneqarnissaa taassuma sulissutigissavaa, politikkikkut inuussutissarsiornikkullu suleqatigiinneq aamma nukittorsarneqarniarluni.
Sung Choilu ukiup affaannaata missaani nunatsinniittarpoq. Taamaattoq USA-p nunatsinni ataavartumik sinniisoqarfeqalerniarnera piviusunngoraluttualerpoq.
AAMMA ATUARUK Nunanut allanut tunngasuni qaffasissumik atorfillip nunarput USA-lu imminnut qaninnerulersissavai
Nazistit Danmarkimik 1940-mi tiguaammata USA nunatsinni sinniisoqarfeqalerpoq, sinniisoqarfilli 1953-imi matuneqarluni.
AAMMA ATUARUK Trumpip Kalaallit Nunaat aningaasarpassuarnik tapiissutinillu akilerniaraluarpaa
USA-p nunatsinni sinniisoqarfeqaleqqinnermigut Kalaallit Nunaanni atorfilittanik attaveqarnerulerlunilu suleqateqarnerulernissaa qulakkeerneqassasoq, inuiaqatigiillumi suleqatigineqarnerulernissaat periarfissanngusssasoq, USA-p allaaseraa.
USA-p nunatsinni aappaagu sinniisoqarfeqalerniarnera, Danmarkip nunanut allanut tunngasunut ministereqarfiata suli uppernarsarnianngilaa.
USA-lli Kalaallit Nunaanni saqqumilaarnerunissaa pillugu nunanut allanut tunngasunut ministereqarfiup USA-llu akornanni oqaloqatigiitoqaleruttortoq ministereqarfiup ukioq manna maajimi uppernarsarpaa.
/ritzau/