USA Iranilu kiisami naapeqqipput
USA-p Irakimi aallartitaata Iranimi aallartitamik naapeqatiginninnera ajunngitsumik pissarsiviusumillu ingerlasimasoq, nutaarsiassaqartitsivik Ritzau allappoq.
USA-p Irakimi ambassadøria Ryan Crocker, Iranimi ambassadøri Hassan Kazemi Bagdad-imi naapeqatigereerlugu oqarpoq pissarsilluarlutik.
- Takujumaarparpulli Iranip Irakimi naalakkersuisuulersunut tapersersuiniarluni neriorsuutini piviusunngortissinnaassanerai, Crocker nangippoq.
Neriorsuutinut ilaapput Iranimi peqqarniisaarniat ataatsimoortukkuutaat arlallit, sakkunik Irakimut eqqussuisartuusorisat akiorniarlugit suleqatigiinnissaat.
Iranip atuumimik sakkussiornera oqaatsimik ataasinnguamilluunniit eqqaaneqanngilaq.
USA-p Iranillu akunnerminni attavitik 1980-imili kipimmatigilli, nunat akornanni naapeqatigiinnerit ullumi pisoq siullersaraat.
USA-p Iranillu aallartitaat Irakimi ministeriunerup Nuri al-Maliki-p angerlarsimaffiani naapipput.
-Bagdad-i qiteralugu nunat ukiorpassuarni naapissimanngitsut naapinnerat siunissami suleqatigiillualernissamut neriulersitsivoq, naatsorsuutigaarpummi Kangianut Qiterlermut tamarmut ajunngitsumik kinguneqarumaartoq, ministeriuneq Maliki oqarpoq.