USA CO2-mik aniatitsivallaannginnissamik isumaqataavoq

USA-p præsidentia George W. Bush prædentiunermini aatsaat taama erseqqitsigisumik sila pillugu iliuuseqarnissamik neriorsuuteqarpoq, EU-kommissionip siulittaasua José Manuel Barroso taama oqarpoq.
Allattoq Louise M. Kleemann
juulip 08-at 2008 06:41

Nunarsuatsinni nunat siuarsimanerpaat arfineq-pingasut, G8-nik taasat, Japanimi ataatsimiinnerannit taama nalunaartoqarpoq.

Nunarsuarmi silap pissusiata allanngoriartorneranut atatillugu iliuuseqarnissamut Københavnimi 2009-mi atsioqatigiissutigisassamut taamaalilluni qanilleriartoqartoq, Barroso oqarpoq.

- CO2-mik aniatitat ukioq 2050-imi affaannanngornissaat siunertaraarput, tungaanullu iliuusissat aalajangersarneqassapput, soorlu uagut EU-mi 2020-ip tungaanut iliuusissaliortugut, kommissionip siulittaasua oqarpoq.

USA, Canada, Frankrig, Italia, Japan, Rusland, Tuluit Nunaat aamma Tyskland G8-mi ilaapput, EU-lu toqqaannartumik ilaasortaanngikkaluarluni immikkut aallartitaqartarpoq.

Silap pissusia pillugu USA-p iliuuseqalersaarneranik Barroso-p oqaasii ilumoornersut Buship Tayakomi peqataagaluarluni suli oqaaseqarfiginngilai. Kina Indialu CO2-mik millisaanianngippata USA peqataanianngitsoq siusinnerusukkut oqaatigineqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq