USA: Aningaaserivinnut aningaasaliissutit iluaqutaalerput

Aningaasat aningaaseriviit annaanniarlugit tunniunneqartut sinneqartooruteqaataalernerat aallartippoq.

Qaammatialunngiut matuma siorna amerikamiut aningaaserivii akiliisinnaajunnaarlutik matoorangajapput. Aningaasaqarniarneq sukkalluinnartumik unittoorpoq, taamaammallu præsidentinngorlaap Obamap aningaasanik attartorsinnaaneq akisunngitsoq aammalu aningaaseriviit piginneqatigiissutaannik pisiortornissaq neqeroorutigaa.

Isornartorsiusunit kamaatigineqarpoq naalagaaffiup maanna dollarinik milliartilikkaanik putumullusooq ulikkaarfeqanngitsumut tunniussuinera, taakkuli kukkupput pingaartumik siunissaq qaninnerusoq eqqarsaatigalugu, maannami paasinarsivoq amerikamiut aningaaseriviisa anginerit arfineq-pingasuusut aningaasaqarnikkut ikiorsiissutitigineqartut utertillugit akilereersimagaat, taakkulu saniatigut erniat aningaasartuutillu akilersimallugit.

Taamaammat naalagaaffik aningaaserivinnut ikiorsiinerminit maanna 4 milliartinik iluanaaruteqarsimalerpoq, amerikamiullu aningaasaqarnermut tunngasutigut atugarliuteqarneranni tamanna nutaarsiassaavoq nuannersoq.

Tamatumali isornartorsiuisut nipangersinngilai, tassa tamatuma peqatigisaanik namminersortut aningaaserivinnut ajornartoortunut aningaasaliinikut naalagaaffimmiup isertitaanit sisamariaammik iluanaaruteqarnerusut paasinarsimmat. Aningaasaliisulli namminersortut aningaaserivinni qularnaannerpaani aningaasaliisimagunarput naalagaaffik taamaaliorsimanngitsoq.

Tassarpiaavorlu sanngiiffigineqartoq, ajornartorsiorfiunerpaammi aningaaseriviit annersaat marluusut, Bank of Amerika aamma CityGroup, suli iluatsittumik ingerlalinngillat. Tassa aappaa nakkaatissagaluarpat naalagaaffik amigartooruteqarujussuassaaq.

Aningaasaqarnikkut immikkut ilisimasallit arlaqartut aningaaserivinnit utertilluni akiliuteqarnerit taama pilertortigisut tupaallaatigivaat.