Uranitalinnik misissuisinnaanngorput

Greenland Minerals and Energy A/S-ip aalajangerneq assorsuaq qujaruppaa.

Aalajangiinerup kingunerissavaa Greenland Minerals and Energy A/S-ip 2011-mi misissueqqaarnissatut pilersaarutigineqartut maanna ingerlassinnaalissammagit.

Tamatuma ilaatigut nassatarissavaa Kuannersuarni aatsitassarsiorfissatut pilersaarutip avatangiisinut, innuttaasunut, peqqinnissamut aningaasaqarnikkullu kinguneriasassaasa misissuiffigineqarnerat.

Misissuinerni taakkunani aatsitassanik piiaanissamut taamanikkussamut akuersissuteqartoqarsinnaalersimassanersoq Naalakkersuisut aalajangernissaminni tunngavissarissaarnerulissapput.

Greenland Minerals and Energy A/S-ip misissuigallarnerisa paasinarsisippaat Kuannersuit tassaagunartut nunarsuarmi "aatsitassanik qaqutigoortunik" taasartagaannik peqarfinni normu 1-iusut.

Kuannersuarni aammattaaq uraneqarpoq. Greenland Minerals and Energy A/S-ip Sermitsiaq, ag.mit apersorneqarluni oqaatigaa, ingerlatseqatigiiffik piiaalissagaluarpat, uranitalinnik misissuinissamut akuersissuteqanngikkunik piiaanissaq imminnut akilersinnaanavianngitsoq.

Misissuigallarnerit paasinarsisippaat Kuannersuit aatsitassarsiorfittut piviusunngortinneqarnissaat kalaallinut inuiaqatigiinnut pingaartumillu Kujataanut aningaasarsiornikkut suliffissaqartitsinikkullu assorsuaq pingaaruteqalerumaartoq.