Uranisiorneq Kalaallit Nunaanni inerteqqutaavoq

Australiamiut aatsitassarsiortitseqatigiiffiat nunatta Kujataani sumiiffinni pingasuni misissuisinnaanermik akuersissutinik pisimallutik nalunaarnerisa kingorna Johan Lund Olsenip tamanna paaserusuppaa.

-Tupigusuutigeqisanik aammalu annilaartaatigisannik paasilerpara australiamiut aatsitassarsiortitseqatigiiffiat uranimik misissuinissamut akuersissummik pissarsitinneqarsimasoq Johan Lund Olsen naalakkersuisunut apeqquteqaatimini allappoq.

Johan Lund Olsen taamatut apeqquteqaateqarpoq, aatsitassarsioqatigiiffik, Prime Minerals Limited, uranimik misissuinissamut akuersissummik pisimanngitsoq Aatsitassat pillugit Qullersaqarfik nalunaaruteqareeraluartoq, taamaallaat aatsitassanik assigiinngitsunik ujaasinissaminut akuersissutinik pisimasoq, misissugassanullu uran imaluunniit navianartumik qinngornillit ilaanngitsut.

Qullersaqarfimmiillu naqissuserneqarpoq uranimik misissuineq piiaanerlu inerteqqutaammat.