Uranisiorlutik qilleripput

Hudsonip kangerliumanersuani Qamanersuarmi Killavaani uranisiorneq pillugu oqallinnerpassuit pisimapput.

Maanna Aatsitassarsiortitseqatigiiffiup, Uranium North Resoursesip, Amer Lakep eqqaani misissueqqaarnermut atatillugu 20-nik misiligutissaminnik qillerinini aallartissimasoq oqaatigaat. Ukiup sinnerani suli 20-eriarluni allanik qillerinerisoqarnissaa aatsitassarsiortitseqatigiiffiup pilersaarutigaa.

Aatsitassarsiortitseqatigiiffik nunap ilaanut ujaasiffigineqartumut uraneqaqisumullu atuisinnaanermik tamakkiisumik piginnittuuvoq; Killavaami ujaasiffigineqartoq annertoorujussuuvoq uranillu saniatigut kuulteqarlunilu siilveqarpoq.

Nunap ilaata uraneqassusaata uppernarsarneqarnissaa, misissuinermi anguniagaavoq.  Mark Kolebabap, Uranium North Resoursesimi pisortaasup oqaatigaa, nunap ilaata piiaanissamut akuersissuteqarfiusup kujataatungaani nunap ilai qilleriffigineqarsimanngitsut maanna suliffeqarfimmit misissuiffigineqalersut.

Misissuineq uranimik qaffasissumik pitsaassusilimmik nassaarnermik kinguneqarumaartoq, taassuma neriuutigaa.

Naak uranisiorneq aallertereeraluartoq, Nunavummi inuit akornanni uranimik piiaaneq pillugu isummat suli assigiinngitsorujussuupput.