Uranip saniatigooralugu piiarneqarsinnaanera ammaffigaat
Nunatsinni uranimik misissuinissamik piiaanissamillu inerteqquteqarnissamik ukiut 20-t matuma siornagut aalajangigaq, Inatsisartuni amerlanerussuteqarluartut allanngortinniarpaat. Siumut, Atassut aamma Demokraatit nalunaaquttap akunnerini pingasuni urani pillugu Inatsisartuni oqallinnermi, allanik aatsitassarsiornermi uranip saniatigooralugu piiarneqarsinnaanera ammaffigigaat, Sermitsiap nittartagaani allaaserineqarpoq.
Allattoq Louise M. Kleemann
novembarip 28-at 2008 07:01
Taamatut allatut isummerneq Australiamiut suliffeqarfiannut Greenland Minerals and Energy-mut, Narsap eqqaani Kuannersuarmi aatsitassanik ujaqqanillu erlinnartunik ujaasisunut pingaaruteqalersinnaavoq. Tassami tamakkua qallorneqassappata uranitaqartussaammata.
Inuit Ataqatigiit aamma Kattusseqatigiit Partiata uranisiornissamik inerteqqut maanna atuuttoq allanngortikkusunngilaat. Naalakkersuisunut ilaasortap Kim Kielsenip aalajangiisoqavitsinnagu sukumiinerusumik paasisitsiniaanissaq neriorsuutigaa.
Inatsisartuni amerlanerussuteqartut taamatut tunngaviusumik isummernerisigut, kommuninngortussap Kommune Kujalliup Kuannersuarni uranisiornissamut akerliunera illuatungilerneqarpoq.
