Uranimut paasisassarsiorneq assigiinngitsunik paasissutissiivoq
Naalakkersuisunut ilaasortat Jens- Erik Kirkegaard aamma Kim Kielsen inatsisartullu aatsitassanut ataatsimiiitialiaani ilaasortat Australiami uranimik piianerit qanoq aqunneqarnersut paasiniarlugit sapaatip akunnerani kingullermi angalapput.
Naalakkersuisunut ilaasortat marluk Australiamut angalaqataasut tusagassiuutinut nalunaaruteqarlutik allapput, Australiami annertuumik pitsaasumillu aqutsisoqarnera maluginiarsimallugu.
- Nunami namminermi geosurvey, tassa nunap sannaanik misissuisarnerit tamakkiisumik nunami namminermi ujarassiornikkut paasissutissanik nalunaarsukkanik nakkutiginnittup pigineqarnissaa pingaaruteqartoq uppernarsivarput, inuussutissarsiornermut aatsitassanullu naalakkersuisoq Jens-Erik Kirkegaard, GEUS-ip suliaasa nunatsinnut nuunneqarnissaanik kissaateqarpoq, oqarpoq.
Avatangiisinut pinngortitamulllu Naalakkersuisoq Kim Kielsen ima oqarpoq:
- Qitiusumi oqartussaasunit aammalu naalagaaffiup ilaani oqartussaasunit erseqqissarneqarpoq, avatangiisinik pinngortitamillu allanngutsaaliuinermi nunani tamalaani isumaqatigiissutini ilisimatusarnikkut siunnersuisarnissaq peqataanissarlu aallaavigineqartut, Kim Kielsen oqarpoq nangillunilu:
- Aatsitassarsiorfinnut ataasiakkaanut atatillugu ataavartumik pinngortitamut avatangiisinullu sunniutaasussat alapernaarsorneqarput, ingerlatseqatigiiffimmit namminermit aammalu oqartussaasunit aallartitanit, Kim Kielsen oqarpoq.
Aatsitassanut ataatsimiititaliami IA sinnerlugu ilaasortaq Naaja Nathanielsen taama isumalluarnartiginngilaq.
- Uranimik piianermut atatillugu nunap inoqqaavisa isumakulunnartitamik paasineqarnissaat ajornakusoortikkaat erseqqeqaaq. Nunap inoqqaavisa ileqqutoqaat oqaasiilu silarsuarmi, aalajangiisartut suliffissuaqarnermilu sulisut inuuffisaanni, inissaqartinneqanngillat. Aamma Nunap inoqqaavisa ajornartorsiutaasa qanoq pissuseqarfiginissaannut nalorninersuaq ersarilluinarpoq, Naaja Nathanielsen Australiami angalanermini takusani pillugit Facebook-imi taama allappoq.
Aamma Naaja Nathanielsenip maluginiarsimavaa nunap inoqqaavi allassinnaanatillu atuarsinnaanngitsut qalliuniarfigineqaqqajaasartut. Oqaatsit periutsillu pisortanit suliffissuaqarnermilu atorneqartartut akisinnaasannginnamikkit.
Kiisalu avatangiisit pillugit suliniaqatigiiffiit suliunitaat ilumoorunneqanngitsut, Naaja Nathanielsenip misigaa.
Uranimut suliassaqarfimmi maleruagassat inatsisillu 2016-imi naammassineqarnissaat Naalakkersuisut siunertaraat, taamaalilluni tassunga nangissutigalugu uranitaqartumik aatsitassarsiorfimmik ingerlatsinissamut tunngatillugu qinnuteqaatit isummerfigineqarsinnaalissallutik.