VIDEO Uranimut akerliusut isumallualersut
Aatsitassanut naalakkersuisoq uranimut akuersaartumiit naaggaarluinnartumik taarserneqarnera nuannaajallatsitsivoq.
- Naalakksersuisunngortitsineq isumalluarnarpoq, Nuummi Urani Naamik-mi siulittaasoq Erik Jensen KNR-imu toqarpoq.
Aamma pinngortitaq avatangiisillu illersorneqarnissaat pillugu suliniaqatigiiffimmi Avatami siulittaasoq aatsitassanut naalakkersuisunngortoq neriulluarfigaat.
- Nuannersumik tupaallappugut. Naalakkersuisup oqaloqatiginissaanut qilanaalereerpugut, Mikkel Myrup KNR-imut oqarpoq.
Ukiuni kingullerni uranimut naaggaartut akerliussutsimik takutitsisarneri arlaqarput. Mannalu naaggaartut tusaaniarneqarnerulernissaat isumalluaatigineqarpoq.
- Suna tamaat qulaajaqqissaaqqaarlugu oqariartuutigisartagarput anguneqarnissaanut neriulluarpugut, Erik Jensen oqarpoq.
Avatami siulittaasup aatsitassanut naalakkersuisunngortoq piviusorsiornerusumik isiginnittariaaseqalernissaa ilimagaa.
- Uranimik piiaasoqarnerani avatangiisinut sunniutissai pillugit piviusorsiornerusumik isiginnittariaaseqassaaq, Mikkel Myrup oqarpoq.
Siumut uranisiornissaq avatangiisinut pinngortitamullu ajoqusiissanngippat akuersaarput. Inuit Ataqatigiit Partii Nalerarlu uranimut naaggaarluinnartuupput.
Taamaattoq naalakkersuisooqatgiilernissamut naaperiaatitut partiit taakku pingasut isumaqatigiissutigaat uarnitalimmik piiaasoqassappat qinngornerup ulorianartut qaffasinnerpaaffissaannik killiliisoqassasoq.
Greenland Minerals & Ernergy Kuannersuarni aatsitassarsiornissamik ukioq manna qinnuteqarnissaa naatsorsuutaavoq. Qinnuteqaallu aatsitassanut naalakkersuisumit, uranimut naaggaarluinnartumit, qanoq qisuariassanersoq Qanoruup paasiniarpaa.
Qanoruup ilanngutassiaa Muté Bourup Egedellu apersorneqarnera ataani takuuk:
